Les Xornaes Internacionales d’Estudiu de l’Academia de la Llingua Asturiana (ALLA) algamen mañana, 7 de payares de 2023, les cuarenta y ún ediciones. El salón d’actos de la primer planta del edificiu alministrativu del Campus d’El Milán acueye tres xornaes d’actividaes académiques, ente’l martes y el xueves, con ponencies, comunicaciones y presentaciones. Les persones matriculaes y qu’asistan a les Xornaes van recibir un certificáu acreitativu.
Les ocho conferencies programaes aborden, ente otres árees de los estudios filolóxicos asturianos, la lliteratura, la toponimia, la fonética o la pragmática. Los sos autores, n’orde cronolóxicu d’intervención, son: Franz Rainer (Wirtschafts Universität Wien), Javier Rivero Grandoso (Universidad de La Laguna), Raquel Fernández-Menéndez (Universidad de Alcalá), Wendy Elvira-García (Universitat de Barcelona), Toribio Fuente Cornejo (Universidá d’Uviéu), Pascual Riesco Chueca (Universidad de Sevilla), Avelino Corral Esteban (Universidad Autónoma de Madrid) y Pedro Riesco García (Universidá d’Uviéu).
La mesma variedá temática carauteriza a les ocho comunicaciones que tamién van tener llugar nestes XLI Xornaes, xunto a tres actos de presentación: el de los númberos más nuevos de dos de les revistes de l’Academia (Ciencies: Cartafueyos de Ciencia y Teunoloxía 13 y Lletres Asturianes 129), el de Paquita Suárez-Coalla (City University of New York) alredor del so audiovisual sobre La mio vida ye una novela y el de les novedaes editoriales de la Secretaría Llingüística del Navia-Eo, que va ufrir Carmen Muñiz (responsable de la Secretaría, codireutora de les Xornaes y profesora de la Universidá d’Uviéu) xunto a los autores Ricardo Saavedra, Carmen Siñeriz y Natalia Riego.
Les Xornaes van tener el so actu d’empiezu institucional mañana, martes 7, a les 12 del meudía. Nél, ta prevista la participación del Presidente de l’ALLA, el Vicerrector de Xestión Académica de la Universidá d’Uviéu y el Decanu de la Facultá de Filosofía y Lletres.
