El programa d’enseñanza non reglada pa persones adultes Falamos vuelve a ufiertar cursos gratuitos d’asturianu y gallego-asturianu (o eonaviegu). Yá en setiembre y col cursu escolar a piques d’entamar, retómase tamién un añu más el llabor formativu de Falamos, qu’un añu más propón una ufierta amplia de cursos pa la temporada serondiega con niveles y formatos variaos.
Falamos vuelve a ufiertar cursos gratuitos d’asturianu y gallego asturianu, mesmo en llinia que presenciales, con varios niveles. La ufierta formativa inclúi cursos d’iniciación, niveles básicu y intermediu d’asturianu y tamién el nivel básicu de gallego-asturianu. Tamién se planteguen distintes opciones pa que l’alumnáu pueda apuntase a clases presenciales o en llinia, col envís de cubrir toles necesidaes de cada participante. Les opciones en llinia inclúin: iniciación al asturianu, nivel básicu d’asturianu y nivel básicu de gallego-asturianu. Dientro de les opciones presenciales, Falamos vuelve a ufiertar cursos d’asturianu nos conceyos de Carreño, Samartín del Rei Aurelio, Villaviciosa, Avilés, Les Regueres, Grau, Sotu’l Barcu, Mieres, Uviéu y Corvera. Y tocantes al gallego-asturianu, van impartise cursos nos conceyos d’Avilés, Bual y Castropol.
Les inscripciones pa los distintos cursos tan abiertes y pueden realizase al traviés de la páxina de Falamos. Pa conocer tolos detalles y inscribise, puedes visitar la so web equí.
