La primer edición del Premiu Lliterariu María Luisa Castellanos, convocáu pola Dirección Xeneral d’Emigración y Polítiques de Retornu (dependiente de la Conseyería de Presidencia, Retu Demográficu, Igualdá y Turismu), súmase a la llista de concursos lliterarios qu’inclúin la opción de participar con obres escrites n’asturianu. Esti premiu garra’l nome de la sufraxista llanisca, esiliada en Méxicu hasta la so muerte en 1974, aprovechando la conexón que tien la so figura cola temática central del concursu: migración y retornu.
El premiu ñaz col envís de siguir avanzando na sensibilización sobre’l fenómenu migratoriu n’Asturies, un territoriu históricamente marcáu pol movimientu y intercambiu d’habitantes con dellos otros llugares del mundu. Asturies nun se entiende ensin toles persones que tuvieron que colar y que pudieron tornar pa «la tierrina», pongamos por casu los indianos. Tamién son importantes pa entender la nuesa historia aquelles que construyeron vides nueves nos sos destinos ensin escaecer los raigaños, como ye’l casu de la comunidá asturiana de Bélxica, por exemplu. Pero nun hemos d’escaecer qu’Asturies tampoco sedría la mesma ensin la diversidá y la bayura cultural que vieno de fuera, trayida por xente que llegó (y sigue llegando) a la gueta d’oportunidaes pa tener una vida meyor.
Bases del I Premiu Lliterariu María Luisa Castellanos
El concursu tá abiertu a toles persones mayores d’edá que presenten obres orixinales y inédites, seyan de narrativa, llírica o teatru, con una estensión de non más de 40 páxines, que tean escrites en cualisquier de les tres llingües d’Asturies (castellán, asturianu o gallegu-asturianu/eonaviegu) y que traten sobre la migración asturiana nun sentíu ampliu. El xuráu reconocerá 3 obres d’ente les presentaes con premios en metálicu y diplomes: primer premiu de 3000€ y diploma, segundu premiu de 2000€ y diploma y tercer premiu de 1000€ y diploma.
Esta primer edición del Premiu Lliterariu María Luisa Castellanos supón una nueva oportunidá de reconocimientu pal llabor de creación lliteraria, venceyando nesti casu l’actividá d’escritura a un fenómenu tan estendíu como son los movimientos migratorios.
Si quies más información, puedes lleer les bases nel estractu del BOPA equí.
