La Tertulia Malory, de L’Entregu, va entregar esti sábadu, 27 d’avientu, a les 18:00 hores, el premiu al meyor llibru n’asturianu del 2024, nun actu público que se va celebrar nel pub Tom Malory de L’Entregu —onde, dende hai yá 28 años, la tertulia vien aconceyando selmanalmente—. La obra ganadora d’esta décimucuarta edición del premiu ye’l poemariu Argayu de la escritora Berta Piñán.
El xuráu tuvo formáu polos escritores Xulio Arbesú, José Luis Rendueles, Solinca Turbón, Roberto Corte, Aique Fernandi, Beatriz Quintana Coro, David Fernán, Margarita Díaz, Rosana Ordíz García, Chechu García y Henrique G. Facuriella, que fallaron el premiu nun actu celebráu na tertulia’l vienres 10 d’ochobre de 2025.
El xuráu destacó, nel acta del fallu, «Argayu furrula como metáfora física, como’l tiempu qu’arrampla colos cuerpos y tamién como esbarrumbe d’un mundu rural na so difícil adaptación a la modernidá. La so voz poética, clara y rellumante, percuerre tiempos, espacios, llugares y xeneraciones algamando un intensu diálogu sobre la culpa y la redención»; el xuráu tamién quixo rescamplar la gran calidá de la producción lliteraria n’asturianu del año 2024, lo que fixo que la decisión de premiar el poemariu se garrara por mayoría.
El gallardón consiste nuna ilustración d’Alfonso Zapico y una medaya conmemorativa.
Esta ye la decimucuarta vez que’l grupu concede esti premiu. L’añu pasáu resultó ganador l’ensayu Nunca vencida, una historia de la idea d’Asturies de David Guardado, y n’ediciones anteriores premiáronse les obres Tiempu d’escoria de Xosé Nel Riesgo; Onde’l caos se texe y se destexe, de Xulio Viejo; Les isles inciertes, de Xuan Bello; Memoria de Tuña, d’Antón García; Incorrectos, de David Artime; El llibru póstumu de Sherezade, de Raquel F. Menéndez; Lluvia d’agostu, de Francisco Álvarez; L’aire ente la rama, d’Ángeles Carbajal; Más espeso que l’agua, de Consuelo Vega; Carne de melandru, de Milio Rodríguez Cueto; La Chelita, de Ruma Barbero, y La ñeve del Cuquiellu, de Xabiero Cayarga. Con esti gallardón, los sos entamadores quieren prestixar les lletres asturianes, al empar que se da difusión a les obras que, a criteriu del xuráu, seyan consideraes los meyores llibros escritos cada añu n’asturianu.
Argayu / Derrumbe ye’l sextu poemariu de Berta Piñán. Asoléyase en edición billingüe castellanu-asturianu.
Argayu / Derrumbe ye un poemariu emocionante y mui bien filvanáu onde Berta Piñán percuerre espacios y xeneraciones d’un mundu rural qu’esbarrumba tal y como lu conocimos. N’Argayu, l’agua empapa la tierra. Los raigaños de los árboles y lo matos que forman una mecigaya nel subsuelu, tienen por ella, too forma parte d’un equilibriu primixeniu. Pero la montaña quémase, les máquinas corten a tayos la roca pa trazar la carretera, el mofu y los raigaños esapaecen y sigue lloviendo. Faelo hasta que la tierra queda blando, daqué argaya y una masa inmenso esbarrumba monte abaxo. Y esi movimientu xigantescu tolo arrastra al so pasu. Ye’l argayu, metáfora qu’acesna les nuestres vides, peñeráes poles renuncies, mieos, goces y fracasos. Esti Argayu/Derrumbe ye un glayíu a la memoria viva d’un mundu rural que s’esvanez. Un esbarrumbe que alloria dende la so verdá más íntima.
Berta Piñán (Cañu, Cangues d’Onís, 1963) ye llicenciada en Filoloxía Hispánica pola Universidá d’Uviéu y una de les voces más destacaes de la lliteratura asturiana. Poeta, ensayista y novelista, ye tamién miembru de númberu de l’Academia de la Llingua Asturiana dende l’añu 2008. Xunto con Antón García y Xuan Bello fundó la revista lliteraria Adréi, ún de los fitos de lo que se dio en llamar segunda xeneración del Surdimientu. Magar que la so obra abarca dende l’ensayu sociollingüísticu hasta la lliteratura infantil y xuvenil, Piñán considérase poeta penriba de too, tien asoleyaos los poemarios Al abellu les besties (1985), Vida privada (1991) col que se fizo col premiu Teodoro Cuesta, Temporada de pesca (1998), Un mes (2003) y Noches de incendio (1985-2002) (2005), con una selección billingüe de los sos poemes, y La mancadura / El daño (2010). En narrativa cuenta col reconocimientu del públicu y la crítica, como ye’l casu de La tierra entero, un volume de cuentos ganador del Premiu de Narraciones Trabe (1996) o La maleta al agua (2005), coleición de relatos sobre la emigración. Nel xéneru infantil y xuvenil tien ganáu’l premiu María Xosefa Canellada, dos vegaes, por Agua, arroz y maíz (2008) y por Vida nel Campu (2018) y el de la Crítica d’Asturies en dos ediciones consecutives con Les coses que-y presten a Fran (2008) y L’estranxeru (2009). Como la muda al sol d’una llagartesa (2018) ye la so primer novela. N’ensayu tien espublizao Tres sieglos construyendo la igualdá. ¿Qué ye’l feminismu? (2003).
Ente 2019 y 2023 foi Conseyera de Cultura, Política Llingüística y Turismu del Principáu d’Asturies.
