Nel añu 2002 publicábase la Historia de la Lliteratura Asturiana. Tratábase d’un trabayu exemplar col que l’ALLA pretendía ufrir un doble serviciu. D’una banda, foi una amuesa sistematizada de la lliteratura asturiana entendía como un corpus autónomu con una tradición que vien yá dende’l sieglu XVII. Pel otru llau, apurríase a la sociedá asturiana una obra de calter didácticu que facilitare’l conocimientu del patrimoniu lliterariu llariegu.
Más de venti años depués, escosada la primer edición, asoléyase esta segunda, incorporando les novedaes últimes. Nestes dos décades incorporáronse munchos y mui importantes testos recuperaos, amás de dellos trabayos y estudios críticos nuevos sobre la lliteratura asturiana. Viendo la bayura d’estes novedaes, anguaño preséntase la obra en dos volúmenes. El primeru d’ellos ye esta Historia de la Lliteratura Asturiana (Tomu I)
La Biblioteca d’Asturies «Ramón Pérez de Ayala» acoyía ayeri, miércoles 10 de setiembre, la presentación del primer tomu de la reedición, correxida y ampliada, de la Historia de la Lliteratura Asturiana.
L’actu celebróse cola presencia de los coordinadores de la obra, Xosé Ramón Iglesias Cueva y Marta Mori d’Arriba; el Presidente de l’ALLA, Xosé Antón González Riaño, y el Direutor Xeneral d’Acción Cultural y Normalización Llingüística del Gobiernu del Principáu d’Asturies, Antón García. D’esta miente, tamién se cuntó cola presencia de dellos de los autores d’un llibru qu’anóvase incorporando les novedaes apaecíes nos años caberos.
Puedes visitar la ficha del llibru na páxina de l’Academia de la Llingua Asturiana faciendo clic equí.
