18 poemarios presentáronse esti añu a la convocatoria de la Sociedá Popular La Regalina de Cadavéu
El premiu Fernán Coronas – Padre Galo de poesía en llingua asturiana fallóse güei na casa natal del escritor en Cadavéu. La ganadora resultó ser la escritosa valdesana María Esther García López, col poemariu “Resclavu”.
El concursu fai esti 2024 trenta años de convocatories, patrocináu dende va tiempu pol establecimientu hoteleru “La reserva de los campos”, y dotáu con 900 euros de premiu, asina como la posibilidá d’espublización.
El xuráu tuvo presidíu por Inaciu Galán, escritor y miembru de l’Academia de la Llingua Asturiana. Fueron miembros del mesmu Claudia Elena Menéndez, profesora de la Universidá d’Uviéu, miembru de númberu de l’Academia de la Llingua Asturiana y directora de la revista lliteraria Formientu, Susana Sela, escritora y animadora sociocultural, Carmen Guardado, profesora y escritora, y Darío de Dios, profesor d’asturianu en secundaria y de lliteratura asturiana na Universidá d’Uviéu.
D’ente les 18 obres presentaes escoyeron trés finalistes de les que salió la obra ganadora, que suma a María Esther García López a la llarga riestra d’autores premiaos col Fernán Coronas, ente los que s’atopen Taresa Lorences, Ánxel Álvarez Llano, Aida Escudero, Miguel Rojo, Solinca Turbón o Pablo X. Suárez.
María Esther García López (La Degoḷḷada – Valdés, Asturies, 1948). Escritora y poeta n’asturianu y en castellán. Destaquen los sos poemarios: L.luribaga (2003), Zamparrampa (2004), Tiempu d’iviernu (2005), Faraguyas (haikus) (2007), Pisaes (2008), poemariu pol que recibe’l “Premiu Uviéu de Poesía”, que convoca’l Conceyu d’Uviéu y El color de los díes (Bajamar editor, 2019). Recibe otros premios en narrativa, como’l Fernandez Lema (L.luarca, 2007) y el Xosé Álvarez del Centru Asturianu de Madrid (2007 y accessit en 2009). Ye autora de delles obres de lliteratura infantil: Musical-landia (2008) Menú de Versos (2009), Deva y el Pitín (2010), Quiero ser Arcu Iris (2014) y Leo (2018) espublizaoa en dos versiones, castellán y asturianu.
Ye autora de llibros de didáctica ya investigación hestórica y etnográfica y ye coautora de llibros de testu pa la enseñanza del asturianu. Collaboradora habitual de La Nueva España y de numberoses revistes de lliteratura y d’investigación. La so obra forma parte tamién de delles antoloxíes.
Esther tien nel so haber dellos galardones ente los que destaquen l’Urogallo de Bronce del Centru Asturianu de Madrid (2007); Amiga de la Biblioteca de L.luarca (2015); Vaqueira d’Honor (2016) Asociación Festival Vaqueiru y de la Vaqueirada; Premiu Timón a la trayectoria lliteraria, L’Arribada, Xixón (2016) y Poeta del Alba en l’Alborada de Candás (2017).
Dalgunos de los sos poemes fueron musicalizados pol compositor Ernesto Paredano, y editaos nel discu Alebrix (2007), y pol tenor Joaquín Pixán pal so discu La Nueva Canción dialogada (2019).
