El xuráu, aconceyáu el 18 de payares, taba formáu por Natalia González Menéndez, Ángeles Carbajal Roza, María Dolores Rodríguez Vázquez y María Fernández Abril, actuando como presidenta Esther Prieto Alonso y de secretariu Samuel Castro González, valoraos los nueve orixinales presentaos, decidió por unanimidá conceder esti I Premiu «Muyer» de Narraciones Trabe a la obra «Pel norte n’El Cantu Llunada», de la que ye autora Marina Pangua Cuesta.
«Pel norte n’El Cantu Llunada» ye una novela muncho bien estructurada, vertebrada pola música, de llectura esixente, escrita con voluntá d’estilu y enllena finura.
L’autora, una voz nueva na narrativa asturiana, presenta una obra coral, na que los personaxes van moviéndose xeográficamente dende un pueblu d’Asturies a países y ciudades europees, movimientu que diversifica’l paisaxe y los ambientes.
Marina Pangua Cuesta (Uviéu, 1992) formó parte de dellos proyectos musicales como Verdasca o l’Asociación de Música Tradicional Muyeres. Profesora de Secundaria, pon clase de Francés. Hasta agora conocida como traductora de versos d’Apollinarire publicaos nel númberu 5/6 de la revista «Campo de los Patos», «Pel norte n’El Campu Llunada» ye la so sorprendente ópera prima.
