El so proyectu de novela «Ashram» foi escoyíu pol comité de la Residencia Lliteraria Xixón como beneficiariu de la I Beca Rosario Acuña pa muyeres escritores que-y permite pasar un mes becada na mesma pa desendolcar el procesu creativu d’escritura narrativa col que vien a Xixón.
Nacida n’Ouviñana, en Cuideiru, Mercedes Ruisánchez ye Filóloga pola Universidá d’Uviéu y anguaño ta xubilada. A lo llargo de 34 años foi profesora de Llingua Castellana y Lliteratura, asina como de Llingua Asturiana y Lliteratura n’Educación Secundaria y Bachilleratu. Foi tamién asesora técnica docente del Centru del Centru de Profesoráu y Recursos d’Avilés, llevando l’Área de Sociollingüística y Biblioteques Escolares dellos años.
Con Xuan Busto y Ángel Valle asoleyó en 1988 la referente Guía bibliográfica pal estudiu de la lliteratura tradicional asturiana. Collaboradora na revista Lliteratura, de l’Academia de la Llingua Asturiana, en 2025 recibió’ unu de los premios más prestixosos de les Lletres Asturianes, el Premiu Fernán Coronas de Poesía en llingua asturiana, pola obra «Camín de casa», en procesu d’espublización.
La Residencia Lliteraria Xixón convocó esta beca en collaboración cola Conceyalía de Cultura y Educación de Xixón, empobinada a muyeres escritores en cualesquier xéneru lliterariu y llingua del mundu que precisen d’un espaciu y tiempu pa la realización d’un proyectu lliterariu abiertu.
La beca ufierta una estancia creativa d’un mes na ciudá de Xixón, n’Asturies, del 24 de payares, al 24 d’avientu del 2025. Inclúi, agospiamientu na Residencia Lliteraria Xixón y dotación pa gastos de tresporte, asina como la organización de dellos actos mientres la estancia de la escritora na Residencia.
Inaciu Galán, director de la Residencia Lliteraria Xixón, espresó’l so contentu cola escoyeta de Mercedes Ruisánchez, «Teniendo en cuenta la curtia nómina de muyeres con novela asoleyada n’asturianu ye una gran noticia que dende la Residencia Lliteraria Xixón podamos poner el nuesu granín d’arena al proyectu d’una nueva novela que siga’l camín entamáu nel sieglu XIX por Enriqueta González Rubín. La lliteratura asturiana ye la única d’Europa que tuvo a una muyer como primer novelista y tenemos de siguir favoreciendo qu’esa tradición tenga continuidá nes lletres asturianes contemporánees. El proyectu de Ruisánchez va ser una valoratible aportación nesi camín».
