La candidatura a la capitalidá mundial de la cultura que pretende Uviéu pal añu 2031 ta afitándose caldía con mayor solidez na montonera d’actividaes organizaes na capital asturiana. Ente les propuestes rellacionaes cola lliteratura, munches de les cuales yá fueron noticia en Formientu mientres los meses caberos, güei queremos destacar la OFELIA (Feria del Llibru d’Uviéu que ñaz como alternativa a lo que venía siendo LibrOviedo).
El Paséu del Bombé, asitiáu na parte alta del Campu San Francisco, ye l’espaciu que va allugar les casetes y la carpa de la OFELIA dende’l xueves 7 al domingu 10 de mayu. Cuatro díes de lliteratura con hasta 34 casetes, repartíes ente editoriales y llibreríes, y más de 60 autores confirmaos ente presentaciones, firmes de llibros y otres actividaes.
Nsta primer edición de la OFELIA destaquen figures como Bernardo Atxaga, Lucía Solla Sobral, Sergio Fanjul, Zara Minst, Carolina Sarmiento, Ricardo Menéndez Salmón o Daniel García Granda, ente munchos otros nomes de dientro y fuera d’Asturies.
La OFELIA paga homenaxe a Xuan Bello y a la uvieína Dolores Medio. La Rede de Biblioteques d’Uviéu trabaya a comuña cola Conceyalía de Cultura pa llograr sacar alantre esta feria que busca ser un referente cultural pa la ciudá y pa toa Asturies.
Formientu na OFELIA
El vienres 8 a les 18:00 hores va tener llugar la presentación del últimu númberu de Formientu nel espaciu de la Biblioteca de La Granxa, nel propiu Bombé, con autores de la revista y una firma d’exemplares xusto darréu na caseta A8 que comparten La Fabriquina y Cuatro Gotes Ediciones.
Arriendes d’esto, otros autores conocíos d’esta casa como Pelayo Olái, Arantxa Margolles o Francisco Priegue van tener el so espaciu pa firmes.
¡Averáivos a esfrutar de la lliteratura nel centru d’Uviéu!
