El proyectu Asturian Writers empieza’l so camín esti sábadu 21 d’avientu en Mieres del Camín. Va ser na Llibrería-Café La Llocura a les 13:00 hores col so coordinador, Miguel Rodríguez Monteavaro, y unu de los sos promotores, Aníbal González. La primer fase del proyectu, que ye de 50 autores (anque yá va ampliada, hai más de 50). La siguiente ye algamar los 100 autores y llueu l’oxetivu ye tornar a castellán y asturianu.
Esti proyectu va consistir nuna plataforma pa dar visibilidá a la lliteratura n’asturianu y en gallegu d’Asturies na rede y va usase como un catálogu d’escritores que tea disponible pa organizadores d’eventos, editoriales, investigadores y pal públicu en xeneral de cualesquier parte de mundu.
El proxectu Asturian Writers naz de la necesidá urxente que tien la lliteratura fecha n’Asturies d’espandese pel mundu. Depués de sieglos viéndose arrequexaes nun territoriu montañosu y marín a la par, les llingües propies d’Asturies, l’asturianu y el gallegu, tienen agora por fin la oportunidá de ser conocíes fuera de les fronteres físiques o mentales que les vieron nacer y desenvolvese. Ye por esto polo qu’Asturian Writers s’asitia agora como una plataforma d’alncuentru y d’apoyu a toes aquelles iniciatives lliteraries contemporánees neses variedaes llingüístiques y anúnciase como un espaciu llibre, sin prexuicios y con vocación de futuru. Les lletres asturianes, tan variaes y riques, amuéstrense nesti portal na so plenitú adulta y cola vista puesta na visibilización y promoción de la lliteratura propia.
