Pola mor del estáu d’alarma declaráu en tol estáu a causa del virus Covid-19, col que se suspenden tolos actos públicos hasta nuevu avisu, la Conseyería de Cultura, Política Llingüística y Turismu anunció va dellos díes, al traviés de la Dirección Xeneral de Política Llingüística, l’aplazamientu hasta la próxima seronda de la XLI edición de la Selmana de les Lletres, que taba prevista pa primeros de mayu, en coincidencia col Día de les Lletres Asturianes.
Esti aplazamientu garantiza, según espliquen dende la Conseyería de Cultura, la normal celebración del actu d’entrega de los certámenes pa escolinos, como yá ye tradición, cola presentación de lliteratura escrita tanto n’asturianu como en gallego-asturianu.
La fecha llímite pa la presentación de los trabayos nos diferentes certámenes será, agora, hasta’l día 15 de mayu de 2020.
