El prósimu vienres 27 de setiembre a les 19:00 hores, la Casa la Cultura Alberto Vega de La Felguera va acoyer la primer presentación del llibru “Coses Rares”, una antoloxía de rellatos de ciencia ficción, fantasía y terror escrita pola autora asturiana Solinca Turbón. Esti eventu promete ser una cita imprescindible pa los amantes de la lliteratura fantástica, con hestorias que t’atrapen dende la primer llinia y lleven al llector a universos enllenos de misteriu, tensión y finales sorprendentes.
“Coses Rares” ye una colección de cuentos que tresporta al llector a situaciones insólites y apavoriantes. Dende viaxes nel tiempu hasta rellatos de terror enraigonaos na mitoloxía asturiana, l’autora somórguianos en mundos onde lo estraño tórnase cotidiano y lo imposible, inevitable. L’estilu narrativu de Turbón, áxil y fluyíu, ta enllenu sorpreses inesperaes.
Solinca Turbón (Llangréu, 1981), llicenciada en sicoloxía y Máster en Xestión Integrada d’Empreses, ye una autora conocida na lliteratura asturiana pola so faceta de poeta. Ganó premios como’l «Nené Losada Rico» (2014) pola obra Lliteratura interna y el «Fernán Coronas» (2018) por Reflexones d’un cuerpu opacu, dambos asoleyaos pola editorial Trabe. En narrativa, algamó’l segundu premiu nel «Concursu de cuentos pola oficialidá» de Bimenes en 2021 y 2022, y ta acabante ganar el Concursu de Microrrellatos «Luisa Rebollar, la Sariega» (2024). Turbón ye tamién miembru activu de la tertulia lliteraria Malory y del Sindicatu d’Autores Llangreanos (SAL).
La presentación del llibru va incluyir tamién una charra cola autora, que va compartir detalles sobre’l procesu creativu detrás de “Coses Rares” y ufrirá a los asistentes la oportunidá d’adientrase nel so fascinante mundu d’hestories. Al acabar l’eventu, va haber una sesión pa dedicar exemplares.
