La Fiesta de la Oficialidá del conceyu de Bimenes vuelve tener una pregonera yerbata. Dende que lo fixera l’escritor Xulio Vixil nel añu 2006, por mor del décimu aniversariu de la Fiesta de la Oficialidá, esta nun tuvo más pregoneros yerbatos. Poro, pal Ayuntamientu Bimenes «ye un arguyu» anunciar que la pregonera de la XXVII Fiesta de la Oficialidá de la Llingua Asturiana va ser Blanca Inés Fernández Quintana (El Capellán, 1994). Blanca ye graduada n’Estudios Clásicos y Románicos y especialista en Llingua Asturiana pola Universidá d’Uviéu y exerce como docente na Educación Secundaria Obligatoria, trabayu que compaxina cola escritura.
Al ufierta-y ser la pregonera d’esti añu l’Ayuntamientu Bimenes quixo «reconocer la so trayectoria como escritora, qu’entamó bien ceo y qu’afitó dafechu siendo tovía bien moza». Asina, en 2021 asoleyó la so primera novela, “L’home les caparines”, y ganó los premios Radagast de Lliteratura Fantástica, convocáu pola editorial del mesmu nome, cola obra “Trovadoresca” y el Xoven de Narrativa Enriqueta González Rubín, por “No que cinca los seres de lleenda”, convocáu pola Conseyería de Cultura. En 2022 algamó’l premiu María Xosefa Canellada de Lliteratura Infantil y Xuvenil”, tamién de la Conseyería de Cultura, con “El cartafueyu d’alquimia». Amás, ta acabante de recibir un reconocimientu dende Italia, el Premiu Internacional Ostana Xoven 2023 «pol compromisu y constancia nel espardimientu y promoción del asturianu na so comunidá, creando y afitando la so propia voz na lliteratura asturiana pa la mocedá».
El sábadu 1 de xunetu, a les 12:00 hores, na Plaza de Miranda de l Douro en Martimporra, participará nel actu institucional de la XXVII Fiesta de la Oficialidá apurriendo’l pregón. Enantes, va tar el miércoles 28 de xunu, a les 19’30 hores, va tar na Casa Cultura de Santuyano, dientro’l circuitu “Autores nel Camín 2023”, falando precisamente de la so última obra premiada y de la lliteratura de xéneru n’asturianu.
