La Tertulia Malory, de L’Entregu, escoyó como meyor llibru n’asturianu de tolos que s’editaron nel 2024 el poemariu Argayu, de la escritora Berta Piñán. El xuráu formáronlu los escritores Xulio Arbesú, José Luis Rendueles, Solinca Turbón, Roberto Corte, Aique Fernandi, Beatriz Quintana Coro, David Fernán, Margarita Díaz, Rosana Ordiz García, Chechu García y Henrique G. Facuriella, que fallaron el premiu nun actu celebráu na tertulia’l vienres 10 d’ochobre de 2025.
Nel acta del fallu sorráyase qu’«Argayu furrula como metáfora física, como’l tiempu qu’arrampla colos cuerpos y tamién como esbarrumbe d’un mundu rural na so difícil adaptación a la modernidá. La voz poética, clara y rellumante, percuerre tiempos, espacios, llugares y xeneraciones algamando un diálogu intensu sobre la culpa y la redención»; el xuráu tamién quixo rescamplar la gran calidá de la producción lliteraria n’asturianu del añu 2024, lo que llevó a que la decisión se garrara por mayoría.
El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu en feches próximes.
Esta ye la decimocuarta vegada que’l grupu concede esti premiu. L’añu pasáu resultó ganador l’ensayu Nunca vencida, una historia de la idea d’Asturies, de David Guardado, y n’ediciones anteriores premiáronse les obres Tiempu d’escoria, de Xosé Nel Riesgo; Onde’l caos se texe y se destexe, de Xulio Viejo; Les isles inciertes, de Xuan Bello; Memoria de Tuña, d’Antón García; Incorrectos, de David Artime; El llibru póstumu de Sherezade, de Raquel F. Menéndez; Lluvia d’agostu, de Francisco Álvarez; L’aire ente la rama, de Ángeles Carbajal; Más espeso que l’agua, de Consuelo Vega; Carne de melandru, de Milio Rodríguez Cueto; La Chelita, de Ruma Barbero, y La ñeve del Cuquiellu, de Xabiero Cayarga. Con esti gallardón, el colectivu que lu entama quier prestixar les lletres asturianes, al empar que se da difusión a les obres que, a criteriu del xuráu, se consideren los meyores llibros escritos cada añu n’asturianu.
Argayu / Derrumbe ye’l sestu poemariu de Berta Piñán y asoleyóse n’edición billingüe castellanu-asturianu. Argayu / Derrumbe ye un poemariu emocionante y mui bien afilvanáu, onde Berta Piñán percuerre espacios y xeneraciones d’un mundu rural qu’esbarrumba tal y como lu conocimos. N’Argayu, l’agua empapa la tierra. Los raigaños de los árboles y los matos que formen una mecigaya nel subsuelu, tienen per ella, too forma parte d’un equilibriu primixeniu. Pero’l monte quema, les máquinas corten a tayos la roca pa echar la carretera, el mofu y los raigaños esapaecen y sigue lloviendo. Failo hasta que la tierra queda blando, daqué argaya y una masa inmenso esbarrumba monte abaxo. Y esi movimientu xigantescu arrástralo too de la que pasa. Ye l’argayu, metáfora qu’acesna les nuestres vides, peñeraes poles renuncies, mieos, gocios y fracasos. Esti Argayu ye un glayíu a la memoria viva d’un mundu rural que s’esvanez. Un esbarrumbe qu’alloria dende la so verdámás íntima.
Berta Piñán (Cañu, Cangues d’Onís, 1963) ye llicenciada en Filoloxía Hispánica pola Universidá d’Uviéu y una de les voces más destacaes de la lliteratura asturiana. Poeta, ensayista y novelista, ye tamién miembru de númberu de l’Academia de la Llingua Asturiana dende l’añu 2008. Xunto con Antón García y Xuan Bello fundó la revista lliteraria Adréi, únde los fitos de lo que se dio en llamar segunda xeneración del Surdimientu. Anque la obra d’ella abarca dende l’ensayu sociollingüísticu hasta la lliteratura infantil y xuvenil, Piñán considérase poeta penriba de too. Tien asoleyaos los poemarios Al abellules besties (1985); Vida privada (1991), col que ganó’lpremiu Teodoro Cuesta; Temporada de pesca (1998);Un mes (2003); Noches de incendio (1985-2002) (2005), con una selección billingüe de los sos poemes, y La mancadura / El daño (2010). En narrativa cuenta col reconocimientu del públicu y la crítica, como ye’l casude La tierra entero, un volume de cuentos ganador del Premiu de Narraciones Trabe (1996) o La maleta al agua(2005), colección de rellatos sobre la emigración. Nel xéneru infantil y xuvenil tien ganáu’l premiu María Xosefa Canellada, dos vegaes, por Agua, arroz y maíz(2008) y por Vida nel Campu (2018) y el de la Crítica d’Asturies en dos ediciones consecutives, con Les coses que-y presten a Fran (2008) y L’estranxeru (2009). Como la muda al sol d’una llagartesa (2018), premiu Xosefa Xovellanos, foi la so primer novela. N’ensayutien espublizao Tres sieglos construyendo la igualdá. ¿Qué ye’l feminismu? (2003). Ente 2019 y 2023 foi Conseyera de Cultura, Política Llingüística y Turismu del Principáu d’Asturies.
