El próximu martes día 24 de setiembre a les 19:00 hores na Llibrería Matadero Uno d’Uviéu, Raúl Alonso presenta’l so últimu poemariu Tiempu de nós, col qu’algamó’l Premiu Asturies Xoven de Poesía 2023. Va acompañalu l’escritor Aníbal González.

«Raúl Alonso García atropa nes páxines que vienen darréu una amuesa bien curiosa d’una poesía del pensamientu y del sentimientu bañada por esos tres océanos, cuasi infinitos, que dellinien el tiempu: el pasáu, el presente y el futuru. L’autor, que nació na llende ente dos sieglos, ente dos milenios, entecrucia nesta riestra de poemes la so mirada moza, una mirada propia que percuerre con voz crítica’l presente y que nagua por acolumbrar la lluz nun futuru nel que nada se ve, y la mirada vieya, una mirada emprestada de les xeneraciones anteriores (les que siguen vives y les que yá morrieron pero que siguen llatiendo nel corazón d’esta tierra). Con ello compón un mosaicu que traza y rellena’l mapa d’una Asturies que quier volver a ser tierra de grana, que ta a la gueta d’un tarrén granible y firme, ente la povisa y el barrizu, pa ser y pa esistir», Francisco Álvarez.

Raúl Alonso (Xixón, 1999) ye hestoriador pola Universidá d’Uviéu y comunicador pola Universidá de Valladolid. En 2019 espublizó’l so primer poemariu, Los días vividos (Ed. Camelot), con dellos poemes n’asturianu. Amás, tien publicao testos na revista Formientu, mesmo que na so versión dixital, y collabora davezu con artículos en musicasturiana.comTiempu de nós ye’l so segundu poemariu.