Acaba l’añu y con él, acaben ciclos y faise alcordanza y balance de lo que foi l’añu que marcha. Esti 2025 foi un añu mui activu a nivel cultural nel conceyu de Mieres, como vien siendo la norma dende hai yá un tiempu. Siguiendo esta tendencia y pa poner el ramu a un añu de taller lliterariu, organízase non ún, sinón dos recitales el mesmu día. Un recital doble col que Mieres festexa l’interés de la ciudadanía pola creación lliteraria.
El grupu del taller de creación lliteraria que coordina Inaciu Galán dientro del programa cultural de la biblioteca pública, incluyida na Casa Cultura Teodoro Cuesta, organiza esti xueves 11 d’avientu una tarde lliteraria per tolo alto. Los recitales van celebrase en dos espacios distintos, de forma consecutiva, algamando asina un mayor alcance.
Los recitales
«¡Mirái, ho!», la primer parte del recital doble, entama a les 18.30h na Sala Xuvenil de la Casa Cultura de Mieres. Actu siguíu, nel espaciu cultural de La Llocura llibrería-café a partir de les 19.30h, la consigna va ser «¿Qué facéis, ho?». El primer recital cumple col espaciu y l’axenda del conceyu, dando tira a los y les escritores que formen parte del alumnáu del taller lliterariu. Nesti espaciu van poder compartir les sos creaciones énte’l públicu dende una posición privilexada. El segundu recital, más distendíu y nun ambiente horizontal de café cultural como ye La Llocura, fai honor al so títulu, incliuyendo al públicu como parte activa con un micro abiertu. D’esta miente, les persones asistentes van poder compartir pieces propies amás de sentir al alumnáu del taller.
El recital lliterariu ye un formatu que trunfa en Mieres, como vienen amosando dende hai años mesmo la Casa Cultura que La Llocura, mui davezu de la mano d’otros colectivos como l’asociación cultural Guah.es Terribles.
Lliteratura y comunidá
Esta iniciativa configura una tarde lliteraria más amplia y que sirve pa caltener y reforciar la conexón ente dos espacios y dos formes d’impulsar la cultura distintes pero complementaries. Cosa que, per otru llau, nun ye nada nuevo. La Llocura collabora habitualmente col área de cultura del conceyu y ello ye ún de los puntos fuertes de dambes instituciones. Porque La Llocura ye toa una institución en Mieres y esti tipu d’actos nun faen más que reafirmalo. Pela parte del proyectu cultural del conceyu, esti recital doble supón siguir na dirección que lleva con pasu firme dende los años d’Aníbal Vázquez: incluyir a la ciudadanía como parte activa de los proyectos, facer cultura tamién dende abaxo y en diálogu col restu d’axentes culturales del Mieres.
El xueves 11 Mieres ufre una tarde más pal recuerdu: una tarde de lliteratura, de reconocimientu mutuu y de facer comunidá al rodiu de la creación lliteraria.
