L’Asociación Sociocultural La Serena convocó’l segundu Concursu Lliterariu “Llano Terrorífico”, que según espliquen dende la organización quier siguir l’ésitu que tuvo l’añu pasáu la primer edición, dedicada a la poesía. Esti añu presenten como novedá cuntar con dos categoríes, una pa obres n’asturianu y otra pa obres en castellán.
La participación nel concursu ye gratuita y pueden participar toes aquelles persones a partir de 16 años con residencia nel estáu español. El rellatu tien de tar enmarcáu nel Xéneru Terror, dende cualesquier puntu de vista.
Les hestories nun pueden pasar de les 500 pallabres (ensin cuntar el títulu). Cada participante va poder presentar un máximu d’una obra que tendrá de ser orixinal, inédita, y nun ser premiada enantes n’otros concursos.
Les obres van presentase obligatoriamente per corréu lletrónicu, axuntaes en formatu PDF o Word y nomaes col so títulu. L’asuntu del corréu va ser II Concursu Lliterariu y nel cuerpu del mensaxe va escribise de nuevo’l títulu de la obra y los datos personales del participante: nome, apellíos, edá, corréu y teléfonu. La dirección a la que s’ha unviar el corréu ye info@asociacionlaserena.es
El plazu de presentación ye dende’l 7 de setiembre hasta’l 25 de setiembre de 2020 a les 23:59. El Xuráu va tar formáu por cuatro miembros representantes del ámbitu lliterario y cultural de Xixón.
Ente les obres recibíes van escoyese 2 finalistes, unu en cada categoría, que van ser publicaes na nuesa revista añal “Ojo al Llano” na edición de 2020. Caún d’ellos va recibir un premiu valoráu en 150€. Los participantes escoyíos van conocer el fallu del xuráu mientres el mes d’ochobre previu a la espublización de la revista.
