El Conceyu Bimenes ta acabante de convocar el XXVI Concursu de Cuentos pola Oficialidá del Asturianu. El plazu pa presentar trabayos acaba’l próximu 31 d’agostu de 2024. Trátase d’unu de los concursos con más trayectoria n’Asturies y nel so palmares hai nomes importantes y que publicaron en Formientu, como Miguel Rodríguez Monteavaro, Pablo Rodríguez Medina o Blanca Fernández Quintana.
Estes son les bases reguladores:
1.- Los cuentos han de tar redactaos en llingua asturiana, respetando les normes ortográfiques vixentes. Sedrán inéditos, de tema llibre, non premiaos n’otros concursos lliterarios y non suxetos a compromisu d’edición.
2.- Los rellatos han tener una estensión máxima de 10 folios y presentase mecanografiaos a doble espaciu, per una sola cara. Unviaránse l’orixinal en papel y una copia en versión
informática (CD o llápiz USB). Cada autor o autora nun podrá presentar namás qu’una obra.
3.- Les obres, ensin firma, tienen de presentase con nomatu. Ésti apaecerá nuna plica, en sobre zarráu, onde constarán nome y apellíos del autor o autora, númberu del DNI, teléfonu de contactu, señes y currículu (con semeya).
4.- Los cuentos han d’unviase a: Ayuntamientu Bimenes (pal XXVI Concursu de Cuentos pola Oficialidá del Asturianu). Plaza de Miranda de l Douro, s/n. CP 33527 – Martimporra
(Bimenes). Afítase’l teléfonu de contactu ya información que vien darréu: 985700004.
5.- El plazu de presentación fina’l día 31 d’agostu de 2024 (fecha del matasellos de correos).
6.- El xuráu tará compuestu por trés miembros cualificaos y presidíu pol Alcalde de Bimenes. Los sos determinos nun podrán retrucase. Cualesquiera de los premios podrá quedar desiertu, según determín del mesmu.
7.- Les obres premiaes sedrán propiedá d’esti Conceyu y nun se devolverá d’oficiu nengún de los trabayos presentaos. Amás, la persona ganadora del concursu tará a disposición del
Conceyu Bimenes pa formar parte del xuráu nes dos ediciones siguientes, polo que, nesi tiempu, nun podrá participar nel certame.
8.- Nel actu institucional d’entrega premios, a celebrar na fecha qu’afite’l Conceyu Bimenes
tres l’apertura de pliques, fadráse una llectura pública del cuentu ganador del primer premiu na voz del so autor o autora.
9.- Afítense los premios que vienen darréu:
Primer premiu ……………………………. 700 €
Segundu premiu …………………………. 525 €
Tercer premiu …………………………….. 300 €
10.- La participación nesti concursu lleva con ella l’aceptación dafechu d’estes bases.
