L’Academia de la Llingua Asturiana fixo esta selmana anuncia de dos publicaciones nueves. Son «La cultura tradicional en Llaviana» y el númberu 130 de la revista «Lletres Asturianes».
Nel casu primeru, ye parte de la coleición Terrén, que echa a andar con La cultura tradicional en Llaviana, volume que recueye, en cuatro capítulos, una parte de la estensa obra del académicu correspondiente Vicente Rodríguez Hevia, asoleyada a lo llargo los años nes publicaciones periódiques de l’Academia de la Llingua Asturiana (ALLA).
Conformen estos testos un corpus pernecesariu pal entendimientu cultural, social, económicu y territorial del conceyu de Llaviana y reconocen al autor llavianés nel so llabor investigador. Nesti volume trátense los temes rellacionaos col espaciu cultural tradicional: los periodos de la güerta y la collecha, l’usu del horru como’l foru del pueblu, la toponimia menor, etc. A ello amiéstase un repasu históricu del aprovechamientu de recursos del ríu y el monte y una descripción de les celebraciones del conceyu Llaviana. Amás, la obra preséntase esti vienres 5 d’abril nel CIDAN de La Pola Llaviana.
Nel casu segundu, el númberu 130 de Lletres Asturianes (LLAA), correspondiente al mes de marzu del añu 2024, agospia artículos qu’estudien aspeutos llingüísticos, lexicográficos, toponímicos, históricos y lliterarios. Estes contribuciones, de gran valir, faen por enanchar el corpus de la publicación y de los estudios sobre la llingua y la lliteratura asturianes.
D’outro llao, el Academia anuncióu a creación d’úa revista lliteraria en eonaviego col oxetivo de que 2024 sexa un año de creación, de crecimento da cultura y lliteratura eonaviega y da mocedá. Pra ello, piden colaboracióis y abren a recepción de manuscritos hasta el 30 de xunio de 2024. Van aceptar testos de calquer xénero lliterario núa revista que vai llevar por nome Viermo Carpinteiro.
