El Muséu del Xurásicu d’Asturies (MUXA) y les biblioteques del conceyu de Colunga convoquen la primer edición del Concursu de Microrrelatos xurásicos na Costa de los Dinosaurios, un certame nel que collaboren el Club de Llectura “El Faru” de Llastres y el Club de Llectura “+Que Llibros” de Colunga y que se realiza nel marcu de los actos del 20º Aniversariu del centru museísticu.
Cada concursante va poder presentar un únicu microrrellatu, con una estensión máxima de 200 palabres, orixinal ya inéditu, que va tratar sobre la paleontoloxía y los dinosaurios polo xeneral y sobre la Costa de los Dinosaurios y el Xurásicu d’Asturies en particular. Va poder tar escritu en castellán, asturianu o gallego-asturianu.
Nel concursu se establecen cuatro categoríes: trés individuales (xeneral, a partir de 18 años; infantil y xuvenil, hasta los 17 años; y local, pa vecinos y vecines del conceyu de Colunga) y una categoría grupal pa escolares de Primaria, Secundaria y Bachiller.
Amás de recibir un llote de bibliografía divulgativa, los premiaos nes categoríes individuales van recibir un pasaporte con accesu ilimitáu al MUXA mientres un añu y el grupu escolar ganador va poder esfrutar d’una visita escolar al Muséu y un taller con tresporte incluyíu dende’l so centru educativu.
Los testos pal concursu tiénense qu’unviar per corréu electrónicu a info@museojurasicoasturias.com dende esti 25 de setiembre hasta’l próximu 25 d’ochobre. va valorase la orixinalidá, creatividá, calidá lliteraria y adecuación al tema del certame y el fallu va facese públicu coincidiendo cola Selmana de la Ciencia, ente’l 4 y el 17 de payares.
