L’Institutu Llionés de Cultura ta acabante de convocar el II Premiu de Lliteratura en llionés «Caitano Álvarez Bardón». A esti concursu van poder participar tolos autores que presenten les sos obres escrites en llingua lleonesa, en cualesquier de les variedaes rexonales llioneses, y van poder unviar obres escrites nos distintos xéneros lliterarios: narrativu (conxuntu de relatos, novela, novela curtia), llíricu, ensayístico o teatral, siempresque cumplan los requisitos d’estensión establecíos.
Tendrán de ser orixinales ya inédites, que nun fueren publicaes nin total nin parcialmente por nengún procedimientu impresu o electrónicu, nin ser premiaes n’otru certame lliterariu, non solamente na fecha d’almisión al premiu sinón nel momentu de proclamación del fallu.
El premiu ta dotáu con trés mil euros (3000,00 €), cantidá suxeta a les retenciones fiscales que correspuendan. La concesión del premiu lleva incluyida la publicación del testu ganador a cargu del Institutu Lleonés de Cultura, con una tirada de 250 exemplares, de los que se va apurrir el 10 % al autor, considerándose como únicu pagu en conceutu de derechos d’autor pola primer edición.
Los orixinales tendrán de tener una estensión mínima de 200 versos nel casu de les obres poétiques, de 35 páxines nel casu de les obres de narrativa, y de 40 páxines nel casu del ensayu y del teatru. Van presentase por triplicao, en DIN-A4, escritos en formatu Word, a 1,5 de interlliniáu, por una sola cara, en lletra Times New Roman, Arial o similar, tamañu 12, debidamente cosíos, grapaos o enllibraos.
Los trabayos van presentase en sobre zarráu y nel so esterior va escribise: II PREMIU DE LLITERATURA EN LLIONÉS “CAITANO ÁLVAREZ BARDÓN” 2023, y el títulu de la obra y,
nel so casu, seudónimu utilizáu. Dientro d’esti sobre va incluyise, de la mesma, otru sobre zarráu nel que primeramente se guardaron, debidamente rellenaos, los siguientes documentos: la solicitú de participación nel premiu (Anexu I), la declaración responsable (Anexu II), un curtiu currículum personal y profesional del autor/a y una fotocopia del DNI o del pasaporte.
