La Conseyería de Cultura, Política Llingüística y Turismu publicó la convocatoria del Premiu Emilio Alarcos de Poesía 2022. El galardón, qu’aumenta anguaño la so dotación hasta los 6.200 euros, estrema obres inédites con una estensión mínima de 300 versos. El plazu de presentación de poemarios va tar abiertu hasta’l 15 de xunu. Puedes consultar les bases del premiu de poesía equí.
Per otru llau, el Boletín Oficial del Principáu (Bopa) tamién recueye güei la convocatoria del Premiu Juan Uría Ríu d’investigación, que triplica la so dotación económica hasta los 6.200 euros. Les investigaciones van poder presentase hasta’l 1 de setiembre. Esti galardón reconoz trabayos d’investigación que traten sobro distintos aspeutos de la cultura asturiana, de calter históricu, etnográficu, filolóxicu o musical, y que faciliten l’espardimientu y promoción del patrimoniu asturianu.
El premiu Alarcos constitúi un referente nel panorama poéticu nacional pola nómina de ganadores qu’axunta nel so palmarés: Javier Almuzara, Eduardo Jordá, Emilio Martín Vargas, Irene Sánchez Carrón, Ioana Gruia, Enrique Gracia Trinidad, Antonio Praena o Julio Rodríguez figuren ente l’elencu.
Nos sos entamos, el certame tuvo presidíu por Ángel González, el poeta asturianu más importante del pasáu sieglu y unu de los más relevantes de la Xeneración de los 50. A lo llargo d’estos 22 años formaron parte del xuráu nomes de gran relevancia como Francisco Brines, Carlos Marzal, Aurora Luque, Caballero Bonald, Chus Visor, José Luis García Martín, Luis Alberto de Cuenca o Josefina Martínez, directora de la Cátedra Emilio Alarcos Llorach, que tuvo nel xuráu dende la primer edición.
Puedes consultar les bases del premiu d’investigación equí.
