1er Premiu nel VIII Concursu de microrrellatos “L’horru del Carbayedo” de l’Asociación de vecinos L’Horru del Carbayedo d’Avilés.
El reló enllenaba la casa con aquel ruxerrux insoportable del segunderu. 23:32. Sacó un platu de la ñevera y sentóse na mesa cola televisión apagada, cola radio apagada, col ánimu apagáu. Malapenes foi quien a llevar nada a la boca. 00:04 Dempués desvitióse y fizo por dormir embaxo’l cobertor. 00:35. Quitó’l cobertor, sacó la sábana, dio vueltes y vueltes, y nun yera quien a zarrar siquiera los güeyos. Volvió a mirar el reló, 02:10, col so cafiante segunderu siempres presente.
A les 8:40 espertó nerviosu. Y otra vegada’l segunderu. La primer nueche de los últimos cuarenta y ocho años que nun dormía con ella y yá sabía’l desenllaz qu’esperaba nel hospital, yá sabía la llamada que diba recibir. Pero nun sabía cuándo.
Entós pensó nel reló. Mirólu y vio la hora. 8:43. ¿A qué-y recordaben aquellos númberos? Dába-y vueltes y entós, cola hora tovía nel reló, sonó’l teléfonu, frayando’l silenciu como un hachu remanáu con violencia. Averóse al aparatu y retrasó lo inevitable, hasta que tuvo les fuercies suficientes pa sentir lo que yá sabía que-y diben dicir.
Garró fuerte’l teléfonu, sentóse nel sofá y lloró, a sabiendes de que yá nada volvería a facelu feliz, salvo l’aliviu de morrer. Entós volvió al reló, y paeció-y que yá nun sonaba’l segunderu, paecía paráu naquella hora, 8:43.
Volvió a ver daqué que-y yera familiar naquellos númberos. Entós recordó y hebo una pequeña amuesa d’allegría na so cara. 8:43, 8 del 43, ¡agostu de 1943! Aquel foi’l mes nel que la conoció, aquel foi’l primer mes de cuarenta y ocho años xuntos. Aquella foi la despidida que-y quixo ufrir al so home.
