Cantimplores y botelles enllenes, de vinu y agua…
Too amestao.
Van col galopiar de les piernes,
colos sos cuerpos chocando,
ximelgando nel balancín del caleyar.
Los pasos firmes, imponentes, fuertes.
A vegaes arrastraos con fuercia,
cola brenga d’una bisarma xabaz.
Esparros dacuando qu’intenten llegar
al final del camín d’una vuelta.
De secute paez que la cantimplora, baillarina, s’abre;
pel gargüelu y la cara escai’l vinu que sigue frío,
demientres na botella cristalina asoma l’agua traicionero…
Los güeyos rellumantes, pola bébora inxerío,
sobresalen, enroxen, enllenénse de llocura,
pola amargura que produz el tastiu finu.
Filvanen los movimientos, los pies,
que restolen, curiosos, cómo nun zarapicar,
pa nun estrapayar la cara escontra’l suelu
y l’alma cola dignidá…
Reconduz el pasu firme, amoriáu pola cantimplora,
agora sí, a la gueta l’agua…
pa intentar arrebaxar.
