CANDÁS
Del muelle pingáu col arume a ocle de la mar,
de la Fonte Santarúa a La Matiella,
de la Farola de San Antonio a Piñeres y La Mata,
esta villa de Candás conversa conmigo selemente,
nes pindies cuestes.
Y ye la so esencia: esa caxa de güevos onde t’engoles
y d’arriba a abaxo degoles, un Cristu benditu que mira
dende’l so altor a Rebolleres, a la mar, la mar que lu topó
y onde l’argayu del Monte Fuxa cásique conversa
cola sablerina de La Palmera.
Sicasí, l’espigón del puertu mira gafu
al so hermanu xigante del Musel,
esi monstruu qu’ a cuenta del progresu domó
los bravos cantiles del Cabu Torres.
SOLEDÁ DEL H.OU
Na soledá del h.ou, el so silenciu pingáu
col clarión de los ñeveros, esi mar de
nubes que degola penriba los valles pero
dexa acolumbrar, tres del Sueve, el finxu’l
cielu.
Lleres impasibles, mudes, llambries segures
pero arispies, la busca d’un oasis de verdor
y agua en metá d’esi nada buxo y blanco
pol que nagües.
Silenciu xabaz que fai alcontrate contigo
mesmu, canales y desventíos per onde
cai la nuestra señaldá pero niciu
d’esperanza onde surde l’agua madre,
procreadora del tortuosu Cares que cuerre,
ensin sabelo, a la muerte o esperanza
d’una nueva mar.
Bendites crestes, seos y lleres
que nos faen sufrir y gociar!
Bendita tierra onde naciemos y pudiemos
Palpiar l’aspereza caliar d’estes montañes
enantes de xuntar la nuesa breve vida,
como la del Cares,
a la diosa Deva y a la mar.
SOMOS
Somos y nun somos. Somos los
llabradores del nuesu destín. Nun somos
amos del inaccesible Puertu Cuera
nin de les congostes canales de Los Urrieles
que lloren lleres calices vienientes de los
ásperos llambriales del Picu Urriellu
y de La Torre Cerréu. Somos el manancial que
surde xeláu de la H.uente Prieta del Cornión,
somos el ñeveru de Cemba Vieya, perpetuu
pero morriendo nel secañu de la seronda.
Poces escosaes y crestes infinites,
aguardando la nuesa prieta muerte
de la que también somos parte.
LA ORIELLA DEL GÜEÑA
Ruxe’l Güeña mansu na seronda per Cangues
pero bravu se torna na primavera cuando bebe
de los xeleros del Cornión.
Arrastra alcordances de los altos h.oos
de Les Peñes Santes,
onde les xabaces llambries son verticales,
infinites y arispies, dures y en caldia
como un h.ornu pel estíu, severes ya implacables,
pol xelu llabraes na nueche del iviernu.
Mientres, el padre Seya, vieyu arrieru que
sabe d’eses coses, baxa cansín pero reciu
arrecostinando la memoria de los altos
cumales d’Amieva y Ponga,
de les riegues qu’un día gociaron
del Monte Peloñu, de los manaciales de Llue
ente implacables desventíos onde
l’alcordanza de los homes perdióse cuantayá,
un mundiu olvidáu de los ponguetos beyuscos
que namás h.abla nes ruines de les muries
y les piedres de les cabañes qu’esbarrumben,
que caen ensin remediu
pa contra’l sumideru del escaezu.
