La Residencia 1863 acaba de convocar la IV Beca Asturies de Lliteratura en Residencia. Esta ayuda, abierta a los y les autores en llingua asturiana o gallego-asturianu que tengan al menos un llibru publicáu, ufierta la posibilidá de pasar el mes d’avientu del 2024 n’A Coruña, agospedándose na Residencia 1863, un apartamentu apartamentu construyíu en 1863 (añu que marca’l Rexurdimento de la lliteratura gallega), remocicáu dafechu pa facilitar la máxima concentración y inspiración nel trabayu lliterariu
La IV Residencia Asturies tien como finalidá l’apoyu, promoción y estímulu de la creación lliteraria en llingua asturiana o n’eonaviegu o gallego-asturianu, potenciando’l so desenvolvimientu creativu col mayor rigor y escelencia. Proporcionar a los y les escritores nestes llingües un espaciu, un tiempu, un contestu y unes condiciones ideales pa la dedicación dafechu al so propiu proyectu de creación lliteraria, ye tamién l’oxetivu d’esti programa.
Les solicitúes pa presentase la IV Residencia Asturies habrán presentase hasta’l día 10 de setiembre del 2024 a les 22:00 h. Desque s’escueya y anuncie la persona a quien se concede esta beca, esta va disfrutar de la mesma a lo llargo del mes d’avientu del 2024 de manera improrrogable o inaplazable. Anque nun ye obligatorio usar la totalidá de los 31 díes, el o la candidata escoyida ha llegar a Galicia a primeros d’esi mes y marchar a la fin del mesmu (nun s’almiten llegaes o salíes a metá de mes).
Pa solicitar la Beca Asturies de lliteratura asturiana en residencia, en concurrencia competitiva, cada escritor o escritora va poder presentar namás un proyectu de creación lliteraria en llingua asturiana n’eonaviegu o gallego-asturianu. Les solicitúes han incluyir estos apartaos:
• Datos personales: nome y apellíos, señes, teléfonu, mail de contactu y fecha de nacencia. Fotocopia del documentu d’identidá de la persona solicitante (.jpg o .pdf).
•Curriculum Vitae o Bio-bibliografía redactada en dos folios como máximu.
• Memoria de PROYECTU: Descripción del proyectu lliterariu que piensa desenvolvese a lo llargo de la beca en Residencia, con indicación del xéneru lliterariu, llingua, sinopsis o tema/es principales, estructura, forma, estilu, tonu, destinatariu y/o cualquier otru detalle que dexe al comité de valoración facese una idea lo más aproximada posible del plan creativu que va siguise. Esta memoria de proyectu lliterariu, qu’habrá ser dafechamente orixinal y inéditu, nun va poder pasar en nengún casu de los dos folios d’estensión (en .doc, .docx o .pdf).
• Dossier lliterariu: Documentu qu’ha contener pieces o fragmentos lliterarios anteriores (publicaos o non) capaces a actuar como muestra representativa del trabayu lliterariu del o de la solicitante. Esti documentu nun pue superar los diez folios (en .doc, .docx o .pdf).
• Carta de motivación pa solicitar esta Beca Asturies de lliteratura asturiana en residencia, de non másd’un foliu d’estensión (en .doc, .docx o .pdf). Desque preparaos toos estos documentos, han mandase nun únicu e-mail a la dirección electrónica 1863coruna@gmail.com, primero de les 22:00 h del día 10 de setiembre del 2024. Los mails han indicar nel ‘asuntu’ estos datos: “IV Residencia Asturies + Nome del solicitante”.
En casu de nun recibise tola información enantes detallada de forma completa, va desestimase la solicitú de participación, quedando escartada de la convocatoria.
