El númberu 132 de Lletres Asturianes (LLAA), correspondiente al mes de marzu del añu 2025, agospia artículos qu’estudien aspeutos fraeolóxicos, lexicográficos, históricos, lliterarios, musicales y traductolóxicos. Estes contribuciones, de gran valir, faen por enanchar el corpus de la publicación y de los estudios sobre la llingua y la lliteratura asturianes.
Nesta ocasión, son ocho los articulos espublizaos de temátiques estremaes:
- De la evolución y del (escasu) caltenimientu del sufixu protorrománicu */-ˈjon-e/ n’asturianu, por Hugo Carbonnelle.
- Mecanismos de cambiu llingüísticu: un averamientu fraseolóxicu, por Llucía Menéndez Díaz.
- «Atiendi, Asturies, atiendi»: los efeutos de la interpretación musical y coleutiva de dellos poemes de Manuel Asur, por Daniela Cortina González.
- Sicilia: proposta di traduzione all’asturiano e commento traduttologico, por Martín Diego Orviz.
- La Lliteratura Infantil y Xuvenil n’asturianu nos 25 caberos años: formatos, temátiques y camín de futuru, por Loreto Díaz Suárez y Aida Bárbara Parrales Rodríguez.
- Conceyu Bable (CB): algunas claves de su nacimiento y rápida expansión, por Marcos Rodríguez Álvarez.
- L’artículu de José Arias de Miranda (1858) sobre les variedaes del asturianu y les sos diferencies col de Gumersindo Laverde Ruiz (1862), por David Guardado Diez.
- (Re)descubriendo a Felisa la Santolaya (1924-2020), por Inaciu Galán y González.
No que cinca a lo estrictamente lliterario, destaquen los artículos de Loreto Díaz Suárez y Aida Bárbara Parrales Rodríguez, d’una banda, y d’Inaciu Galán y Gonzalez. Nel primer casu, les autores faen un análisis fondu de la lliteratura asturiana empobinada a la reciella y a la mocedá mientres el primer cuartu del sieglu XXI, afondando nos formatos, tématiques y les posibilidaes d’esta lliteratura pal presente y pal futuru. Pa ello, creóse una base de datos con un corpus de 462 obres espublizaes n’asturianu dende l’añu 2000 al 2024. Pa la clasificación de los resultaos estrayíos, aplicóse’l criteriu d’edá, temática, complexidá llingüística y xéneru/subxéneru. L’análisis que s’ufierta faise en función de los xéneros/subxéneros lliterarios, les temátiques y los formatos, rellacionando los resultaos coles tendencies de LLIX nel ámbitu hispánicu y trazando una perspectiva de futuru.
D’otra banda, Inaciu Galán recueye’l rellatu de la vida y obra de la escritora asturiana Felisa Granda «Felisa la Santolaya» (1924-2020), autora popular que dexó asoleyada una obra de considerable continuidá en dellos volúmenes. Analícense les perspectives lliteraries y llingüístiques de l’autora, al traviés de les entrevistes y testimonios familiares que pudimos recoyer, asina como una escoyeta de fragmentos de la so obra esbillaos como amuesa.
Amás d’ello, Lletres Asturienes tamién asoleya trés reseñes bibliográfiques:
- Recherches sur la toponymie de l’arrondissement de Lure (Haute-Saône): linguistique historique, dialectologie, traces d’histoire. En collaboration avec Daniel Curtit, Alain Guillaume, Jean Hennequin et Louis Jeandel. Chambon, J.-P. (2023). [Travaux de Linguistique Romane. Lexicologie, onomastique, lexicographie, 10]. Strasbourg: EliPHi, 651 p., por Loreto Díaz Suárez.
- Intrecci di nomi. Studi di onomastica letteraria per Donatella Bremer, Mirto, S. e Sale, G. (2024). Pisa: Edizioni ETS. 424 p., por Franceso Sestito.
- Dizionari de Lenghe Furlane (DLF). CLAAP [soc. coop. par cure di Alessandro Carrozzo] (2024), por Silvia Tantimonaco.
A lo último, l’exemplar recueye tamién les les anuncies filolóxiques, lliteraries y socioculturales más relevantes de l’Academia de la Llingua Asturiana y otros organismos o instituciones. Esti númberu 132 inclúi les siguientes anuncies correspondientes al periodu ente ochobre de 2024 y marzu de 2025:
- L’ALCEM presenta nel llar de l’Academia de la Llingua Asturiana la so resolución llingüística p’Asturies
- Presencia de l’Academia de la Llingua Asturiana nel actu del Día Européu de les Llingües
David Guardado en València - XLI Xornaes Internacionales d’Estudiu
- IV Congresu Toponomasticon Hispaniae
- Presentaciones de les últimes espublizaciones de l’Academia de la Llingua Asturiana
- Olimpiada escolar de redaición y certame d’investigación
- «Intelixencia artificial»: neoloxismu asturianu del añu 2024
- Prueba de conocencia
- Congresu Mundial de Cultura Asturiana (CMCA25)
