Beatriz Quintana Coro ye la ganadora de la tercer edición del Premiu Enriqueta González Rubín de narrativa moza n’asturianu, que promueve la Viceconseyería de Cultura, Política Llingüística y Deporte. La so novela La tráxica hestoria de cómo Abraham mató la música foi reconocida pol xuráu del gallardón por “la orixinalidá del so argumentu y la narración áxil y bien estructurada qu’ufierta un viaxe temporal al traviés de la música clásica”.
El xuráu taba formáu por Aymara González Montoto, traductora y profesora; Gonzalo Llamedo Pandiella, escritor y profesor; Tamara Collar Rodríguez, profesora; Solinca Turbón Cuesta, escritora, y Andrés Fernández Menéndez, autor ganador de la edición anterior. El director xeneral d’Acción Cultural y Normalización Llingüística actuó como presidente y Laura Marcos, filóloga adscrita al Serviciu de Planificación Llingüística, como secretaria.
Esta escritora moza presenta un rellatu de terror construyíu a partir de la socesión d’una serie d’acontecimientos tráxicos en dellos llugares y époques de la historia conectaos al traviés d’un elementu común.
El Premiu Enriqueta González Rubín de narrativa moza n’asturianu ta dotáu con 3.000 euros. El Gobiernu d’Asturies impulsó’l gallardón nel añu 2021 pa reconocer el talentu de la producción lliteraria de les voces nueves de la lliteratura en llingua asturiana. Nes ediciones anteriores, el premiu recayó nos escritores Blanca Fernández Quintana y Andrés Fernández Menéndez.
Beatriz Quintana Coro (Riañu, 1995) cursó’l grau de Llingües Modernes y les sos Lliteratures na Universidá d’Uviéu y trabaya como profesora d’enseñanza secundaria. Como escritora collaboró cola revista Lliteratura, qu’edita l’Academia de la Llingua Asturiana, y l’añu pasáu resultó ganadora de la VII edición del concursu Entaína a escribir de microrrelatos improvisados.
