La Selmana de les Lletres Asturianes, organizada pol Gobiernu d’Asturies dende hai 47 ediciones, paga homenaxe esti añu a Taresa Cónsul, monxa benedictina considerada la primer dramaturga conocida en llingua asturiana, y al teatru popular o costumista asturianu, un xéneru de raigañu centenariu que desempeñó un papel esencial na tresmisión cultural y llingüística d’Asturies.
Les actividaes al rodiu d’esta celebración estiéndense dende’l xueves 30 d’abril hasta’l domingu 10 de mayu, siendo’l día grande el vienres 8, Día de les Lletres Asturianes. Como yá ye tradición, va haber un 10 % de descuentu na compra de llibros o discos n’asturianu y regalu del llibru De viva voz. Taresa Cónsul y el teatru asturianu nes tiendes participantes (hasta escosar los exemplares). Nes llibreríes marcaes con un asteriscu nel programa, cola compra de llibros o discos n’eonaviegu regálase’l llibru Cásasenos a nena, de Manuel García Galano.
Puedes consultar el programa completu equí.
47 DÍA DE LES LLETRES ASTURIANES – VIENRES 8
10.30 y 12.30 H | Uviéu · Muséu Arqueolóxicu d’Asturies. Camín del conventu. Perfomance. Dramaturxa y dirección de Laura Iglesia, cola actuación d’Ana Morán y David Varela.
11.00 H | Siero · Centru Polivalente Integráu (CPI) de Llugones. Actu d’entrega de reconocimientos a ganadores de los certámenes escolares de la Conseyería d’Educación pola Selmana de les Lletres Asturianes. Cola presentación y actuación de Carlos Alba, Cellero.
19.00 H | Uviéu · Teatru Campoamor. Actu institucional central del 47 Dia de les Lletres Asturianes, d’accesu llibre, con homenaxe a Berta Pinñán (IV Premiu Nacional de Lliteratura), recital y conciertos de gaita y coru.
MANIFESTACIÓN POLA OFICIALIDÁ – SÁBADU 9
El 47 Día de les Lletres Asturianes, enmarcáu na Selmana de les Lletres, nun podía pasar ensin una demostración del puxu reivindicativu y social qu’emburria esti festexu. Poro, el sábadu 9 va tener llugar la manifestación pola oficialidá del asturianu que yá ye tradición, saliendo a les 12.00 h de la Estación de Trenes d’Uviéu pa percorrer les cais de la capital glayando al altu la lleva. Una reivindicación histórica que cada añu axunta miles de persones con un oxetivu común: la oficialidá. Dalgún día sedrá una celebración y non una reivindicación, pero hasta entós, toca siguir glayando: ¡OFICIALIDÁ!
