Veranu Lliterariu ye una actividá de promoción y animación a la llectura de lliteratura infantil n’asturianu, organizada pola Casa de la Llingua del Conceyu de Corvera, que va desarrollase a lo llargo de los meses de xunetu y agostu nel salón d’actos del Centru Sociocultural de Les Vegues. Va ser la novena edición d’una actividá pionera y referencial nel ámbitu de la lliteratura asturiana dirixida al públicu infantil.
Tala actividá consiste n’alcuentros ente escritores y tolos/es neños/es que quieran asistir; cada escritor acerca y cuenta una de les sos producciones lliteraries a los rapacinos, n’alcuentros d’una hora de duración, que poles sos característiques dan en ser distintos y únicos.
La llectura de los cuentos suel vese acompañada d’otres actividaes más, como pueden ser pintar, xuegos de memoria, cantar, etc.
El Veranu Lliterariu llega a la novena edición, onde va cuntar cola presencia d’escritores como Berto García, Daniel García Granda, Esther García, Xurde Fernández, Susana Sela y Maitetxu Isla, Inaciu Galán y Vero Suari, y Aurelio G. Ovies.
5 de xunetu: Berto García Cuadros con munchu cuentu
L’escritor corveranu Berto García, maestru de la escuela de Les Vegues, vuelve participar nel Veranu Lliterariu, ufriendo nesta ocasión el taller “Cuadros con munchu cuentu”, una actividá onde va cuntar histories que surden de cuadros de sonadía; cuentos imaxinarios que nacen de pintures bien conocíes, casu d’El glayíu de Munch, El retratu d’una casa de Paul Klee, ente más otres.
12 de xunetu: Daniel García Granda Amorina motosierra
El profesor Daniel García Granda (La Pola, 1972), más conocíu pola producción poética p’adultos (casu d’obres como Poemes del últimu selvaxe o El Remediu), ye ún de los nomes nuevos de la lliteratura infantil n’asturianu. Daniel García Granda llega’l 12 de xunetu a Las Vegas/Les Vegues p’acercar a los neños de Corvera la so obra Amorina motosierra, un álbum infantil ilustráu que tien como protagonista una neña irreverente, que deprende muncho y bueno del güelu y que remana la motosierra como naide.
19 de xunetu: Esther García
Presidenta de l’Asociación d’Escritores d’Asturies y académica de la llingua asturiana, la maestra valdesana ye una de les escritores que vien dedicando más atención a la reciella nos años últimos. Una buena muestra d’ello son títulos como Menú de versos, Deva y el pitín, Musical-Landia, Leo, Zamparrampa, etc.
26 de xunetu: Xurde Fernández Ariel y Berta
Profesor d’enseñanza secundaria, la de Xurde Fernández ye una de les voces creatives más prolífiques na lliteratura asturiana del sieglu XXI, onde destaquen, dientro de la obra dirixida al públicu adultu, llibros de relatos como Volver y Ucrania y otros nomes de muyer; y noveles como La espera, Díes d’iviernu, Intentu d’escritura, Aeropuertu y El color del escaezu (estes dos últimes escrites en xunto con Marián García). Dientro de la so producción dirixida al públicu infantil y xuvenil, destaquen títulos como Antón quería ser porteru, L’árbol de la verdá o Febreru, 29.
Xurde Fernández llega a Corvera p’acercar a los neños de Corvera les aventures d’Ariel y de Berta.
AGOSTU
2 d’agostu: Inaciu Galán y Vero Suari La curuxa Catuxa
Los escritores Inaciu Galán y Vero Suari ganaron el premiu María Josefa Canellada de lliteratura infantil y xuvenil nel 2020 con La curuxa Catuxa, una obra tovía non publicada y onde adapten un tema universal como la perda de dientes a la cultura asturiana, combinándolo con maxa y con tresmisión de valores como la solidaridá y el respetu a la diversidá. Una obra escrita n’especial pa lo más pequeñino de casa.
9 d’agostu: Susana Sela & Maitetxu Isla ¡Bum!
La escritora Susana Sela Rodríguez, componente de l’Asociación d’Investigación Etnográfica Escontra’l Raigañu, vien desarrollando dende hai años un llabor lliterariu de la que son bona muestra los poemarios Cuantayá que dios fuxó o Ausencies, amás d’una retafila de collaboraciones en publicaciones como Lletres Asturianes. A Corvera va trayer l’últimu llibru que publicó, ¡Bum!, acompañada de la ilustradora del llibru, Maitetxu Isla; una obra dirixida a neños ente 0 y 6 años que protagoniza Maximín, un rapacín que vive aventures onde tropieza con seres mitolóxicos asturianos.
23 d’agostu: Aurelio G. Ovies Versonaxes
Profesor de la Universidá d’Uviéu, l’escritor gozoniegu vien publicando poesía pa la reciella nos años últimos y va traenos una muestra de los versos d’él, que yá publicó en llibros como Mio ma, Cascoxu, Chispina, Too ama, El poema que cayó a la mar, Loles o Versonaxes, que va ser el llibru protagonista de la sesión que va facer nel Veranu Lliterariu de Corvera.
Los alcuentros van facese tolos llunes de xunetu y agostu nel salón d’actos del Centru Sociocultural de Les Vegues/Las Vegas n’horariu de les 11:30 a les 12:30 hores, y nellos va mostrase la diversidá y pluralidá de la lliteratura asturiana d’anguaño. L’asistencia ye llibre y de baldre.
