Esti sábadu, 3 de xunetu, l’Academia de la Llingua Asturiana fixo homenaxe a Xosé Bolado García, académicu de Númberu fináu’l 20 de mayu pasáu. Nel actu, que tuvo llugar na Biblioteca d’Asturies «Ramón Pérez de Ayala», presentóse’l llibru homenaxe al autor, N’harmonía, Agora que sigues con nós…, nel que se recueyen les sos composiciones poétiques asoleyaes nes revistes de la Institución (Lletres Asturianes, Lletres Lliterariu y Lliteratura).
Na presentación d’esti llibru contóse coles pallabres iniciales del presidente de la
Institución, Xosé Antón González Riaño, que faló a los asistentes de la figura de Xosé Bolado y la so importancia ya implicación cola ALLA y la lliteratura asturiana. Darréu d’ello, Aurelio González Ovies, profesor de la Universidá d’Uviéu fixo un repás curtiu de la poética del autor homenaxáu, afondando nel so llinguaxe poéticu y les sos característiques más señalaes.
L’homenaxe pesllóse cola llectura de dellos poemes inxertos nel volume acabante asoleyar, col acompañamientu musical de María Álvarez Santiago. Asina, Berta Piñán, Ana Cano, Xosé Ramón Iglesias Cueva, Taresa Lorences, Paz Fonticiella, Pablo Texón, MartaMori, Cristina Valdés, Pilar Fidalgo y Emilia Vázquez lleeron al públicu asistente una esbilla de los poemes espublizaos en N’harmonía, Agora que sigues con nós…
Ente’l públicu tuvieron amás de la hermana de Xosé Bolado y otros amigos y amigues, escritores y representantes del mundu cultural asturianu, como Lourdes Álvarez, Lluis Xabel Álvarez «Texuca», Ánxel Nava, Iván Llera, Víctor Suárez, Roberto González-Quevedo, Inaciu Galán, María Esther García López, Ramón d’Andrés o Carlos Rubiera.
