L’actu d’entrega del I Premiu Yolanda Huergo pa trabayos d’investigación n’asturianu tendrá llugar nel Muséu Barjola de Xixón güei viernes 1 d’avientu, a les 7 de la tarde. Nel actu van participar representantes de l’asociación Grana, creada n’alcordanza de Yolanda Huergo, asina como’l premiáu con esta primer edición, Inaciu Galán. L’actu va pesllase con una actuación musical de Xel Pereda.
El xuráu del I Premiu Yolanda Huergo pa trabayos d’investigación n’asturianu entamáu pola asociación Grana, y formáu pola editora y escritora Esther Prieto, el profesor d’Historia José Luis Carmona y el profesor de Filosofía Oliverio Martínez, acordó conceder por unanimidá’l premiu a la obra “Los cuartos propios de la lliteratura asturiana: una conversación colectiva”, trabayu presentáu por Inaciu Galán. El xuráu quiso rescamplar de la obra ganadora’l camín qu’abre nel estudiu de la lliteratura n’asturianu fecha por muyeres, el precuru llingüísticu y estilísticu del trabayu, asina como la orixinalidá del planteamientu de la investigación.
El ganador, Inaciu Galán y González (Xixón, 1986) ye miembru de l’Academia de la Llingua Asturiana, Doctor pola Universidá d’Uviéu, Máster en Sociedá de la Información y el Conocimientu na Universitat Oberta de Catalunya (UOC), Graduáu en Periodismu pola Universidá a Distancia de Madrid (UDIMA) y Diplomáu en Turismu y Especialista en Xestión Cultural pola Universidá d’Uviéu. Ta formáu como profesor na especialidá d’asturianu col Máster de Formación del Profesoráu. Pol so llabor a favor del asturianu foi reconocíu col Premiu Urogallo 2012 del Centru Asturianu de Madrid.
Como investigador algamó en 2007 los premios de l’Academia de la Llingua Asturiana ‘Concursu de recoyida de material toponímico’ (con Marta Lozano Carbajal) pol trabayu sobre’l so pueblu familiar “Toponimia de La Collá (Siero)” becáu pol Conceyu de Siero y qu’asoleyó l’ALLA dientro de la so coleición “Toponimia” y un accesit nel ‘Concursu de recoyida de material lliterario escrito Federico Fierro G.-Botas’ pola edición de ‘Nieve en el puerto’ d’Eladio Verde. En 2008, recibe dos accésit del mesmu premiu polos trabayos titulaos ‘Cosiquines de pocu más o menos d’Antonio Pérez González’ y ‘Poesíes asturianes en Nostalgia de Francisco de la Vega’, y en 2009, repite con ‘Amuesa de publicidá en llingua asturiana’. En 2010 algama otru accesit nel ‘Concursu de recoyida de material lliterario escrito Federico Fierro G.-Botas’ por ‘Yo quixera cantate y otros poemes llangreanos (1921-1976)’, volviendo a algamalu en 2014 por ‘Coples d’Antroxu y otros testos n’asturianu con Xixón de fondu (1898-1928). Como realizador dirixó proyectos audiovisuales como’l documental Elles, muyeres na lliteratura asturiana.
Ún de los oxetivos principales de l’asociación “Grana, n’Alcordanza de Yolanda Huergo” ye afalar el debate, l’intercambiu d’idees y la creación de conocimientu n’Asturies. Por too ello, Grana convocó esta primer edición del Premiu Yolanda Huergo, que quier reconocer trabayos d’investigación de cualesquier estaya de conocimientu y llínia d’estudiu fechos o traducíos al asturianu.
La dotación del premiu ye de 1.500 € y l’asociación afalará la publicación del trabayu premiáu. Pol so carácter biañal, el II Premiu Yolanda Huergo pa trabayos d’investigación n’asturianu convocaráse nuevamente en 2025.
