La Biblioteca d’Asturies Ramón Pérez de Ayala aumenta la so programación d’actividaes p’adultos cola puesta en marcha de la primer edición del ciclu Palabra viva. Alcuentros na Biblioteca d’Asturies. Estos alcuentros, que nacen coles mires de dinamizar l’intercambiu cultural, van proponer un percorríu polos distintos xéneros de la lliteratura creada por autores asturianos, tanto en castellán como n’asturianu.
La primer sesión de Palabra viva va celebrase’l próximu miércoles, día 29, a partir de les 19:30 hores, nel salón d’actos de la biblioteca y va axuntar a los poetes Pedro Menéndez, Natalia Menéndez y Nacho González. La entrada va ser llibre pa tol públicu interesáu.
Hasta’l 21 de xunu, el programa inclúi un total de siete alcuentros coordinaos pola cofundadora del colectivu artísticu-cultural Musa Cafeína, Ana Lamela.
Cada sesión va enfotase nun xéneru lliterariu distintu (poesía, narrativa, teatru, cómic, lliteratura de ficción y lliteratura infantil y xuvenil) y va cuntar con reconocíes autores y autores asturianos. En cada alcuentru analizará l’estáu del xéneru lliterariu protagonista de la xornada, cola cuenta de xenerar un alderique enriquecedor tantu pa escritores y escritores como p’asistentes, usuarios y llectores de la biblioteca.
