La primera residencia lliteraria d’Asturies va acoyer a les escritores Romina Berenice Canet y Marisa Martínez Pérsico
L’actividá sigue nesti final d’añu na Residencia Lliteraria Xixón, con dos escritores arxentines, Marisa Martínez Pérsico y Romina Berenice Canet, residentes nel n’Italia y nel Reinu Xuníu, respectivamente. Mientres el so pasu per Xixón va tener llugar un actu públicu nel que van presentar los sos llibros y va poder conocese a les autores y conversar con elles sobre la so obra. L’actu va celebrase’l xueves 14 de payares a les 20 hores na Llibrería de bolsillo, en Xixón.
Los sos proyectos
Na so estancia na Residencia Lliteraria Xixón, Marisa Martínez Pérsico va trabayar nuna investigación «in situ» sobre billingüismu y autotraducción endóxena castellanu/asturianu nel marcu del proyectu d’investigación del que forma parte na Università degli Studi di Udine (ITALIA), incluyendo poetes asturianos autotraductores nesta base de datos. Pa ello va entrevistar a dellos escritores n’asturianu.
Pela so parte Romina Berenice Canet trai como proyectu pa desendolcar na Residencia Lliteraria Xixón el trabayar na ilustración del so tercer llibru de poesía y rematar la so primer novela, amás de participar en delles actividaes mientres la so estancia.
Les autores
Romina Berenice Canet nació en Río Ceballos, Córdoba (L’Arxentina), nel añu 1977. Ye egresada de Belles Artes de la Escuela d’Artes Visuales «Antonio Berni» de Bonos Aires, especializada en grabáu y pintura. Estudió tamié teatru, música, técnica mural y trapeciu na Escuela de Circu de Bristol, Inglaterra, onde s’anició en 2010. Trabayó na restauración d’antigüedaes del Palaciu de Santa Cruz de Madrid y dedícase a la confección de moñeques y osos de colección que llograron premios internacionales y fueron espuestos na Arxentina, Xapón, Canadá, Inglaterra, Italia, Alemaña y Estaos Xuníos, ente otros países del mundu. Formó parte de la comisión directiva de APOA (Asociación de Poetas Argentinos) y coordinó el ciclu «Otros Animales» en La Casa de la Poesía de Bonos Aires. En 2010 preparó una antoloxía pal Fondu Nacional de les Artes. Como poeta espublizó «Resabio de las fiestas» (Ediciones La guillotina, Bonos Aires, 2004) qu’inclúi doce llitografíes de so y “La Maleza” (Bartleby Editores, Madrid, 2023) ganador del XLIII Premio Iberoamericano de poesía Juan Ramón Jiménez 2023. Tien un poemariu inéditu y una nouvelle en cursu.
Marisa Martínez Pérsico (Buenos Aires, 1978), poeta, narradora y crítica lliteraria arxentina. Doctora en Lliteratura Española ya Hispanoamericana pola Universidá de Salamanca y graduada en Lletres pola Universidá de Bonos Aires. Tien doble nacionalidá española por orixe familiar.
En 2010 asitióse n’Italia. Acreditada a profesora titular pol Ministeriu d’educación italianu, enseña llingua y traducción española na Università degli Studi di Udine y foi profesora visitante en numberoses universidaes europees (Oxford, Kragujevac, Cambridge, San Clemente de Ojrid). Espublizó nueve llibros de poesía: Las voces de las hojas (Argentina, Ediciones Baobab, 1998, Premio Nacional Río de la Plata II), Poética ambulante (Argentina, 2003, Ediciones del Gobierno de la Provincia de Buenos Aires, autora seleccionada en el Certamen Arte Joven de la Provincia), Los pliegos obtusos (Argentina, 2004, Ediciones del Gobierno de la Provincia de Buenos Aires, autora seleccionada en el Certamen Arte Joven de la Provincia), La única puerta era la tuya (España, Verbum, 2015, finalista del II Premio Pilar Fernández Labrador), El cielo entre paréntesis (España, 2017, Valparaíso Ediciones / USA), Finlandia (España/Chile, RIL Editores, 2021), Principios y continuaciones (Pre-Textos, 2021), Las cosas que compramos en los viajes (XXIV Premio Latinoamericano de Poesía Ciro Mendía, Colombia, 2022) y Los parques interiores (XLVIII Premio Nacional de Poesía Rafael Morales, España, 2023 – finalista XXXV Premio Loewe).
Ediciones Del Dock espublizó la so antoloxía Peces de ojos tristes. Poesía escogida (1998-2023) na colección «Pez Náufrago» (declarada d’interés cultural pola Secretaría de Cultura de la Presidencia de la Nación Arxentina).
Como narradora espublizó: Las manos en la madre (novela, RIL Editores, 2018); Animales blancos (RIL, 2024). Finalista del XXXV Premio Ana María Matute de relato (Ediciones Torremozas, España, 2024).
Obtuvo residencies d’escritura en Finlandia (Nuoren Voiman Liitto Foundation), Suecia (Baltic Centre for Writers and Translators) y Portugal (Cerdeira House for Creativity).
Residencia Lliteraria Xixón
L’escritor y xestor cultural Inaciu Galán vivió nesti espaciu a lo llargo de cuasi una década y en 2023 pon a disposición l’apartamentu pa la creación lliteraria dende Xixón, buscando tender pontes con otres lliteratures, otres llingües, otres cultures…
La Residencia Lliteraria Xixón abrió les sos puertes a finales de 2023 y dende entós vien recibiendo a dellos escritores y traductores con proyectos de creación.
Páxina de la Residencia Lliteraria Xixón.
