La Residencia Lliteraria Xixón recibe esti mes d’abril a una nueva residente, l’autora Idoia Carramiñana. Mientres la so estancia esti mes d’abril va desenvolver el so proyectu lliterariu nuevu, una novela curtia escrita n’euskera y ambientada nun futuru distópicu. Nella, l’autora amuesa un universu alteriáu onde, a diferencia de la realidá actual, son les persones que quieren tener fíos biolóxicos los que tienen de sometese a llargos procesos d’evaluación, como ocurre na actualidá colos que opten pola adopción. Una propuesta que cuestiona directamente los modelos de maternidá, los cuerpos y los procesos d’adopción.
Como parte de la so residencia, esti miércoles 16 d’abril va celebrar un actu abiertu al públicu en Bolboreta Bar (Avenida Castiella, 29, Xixón), nel que l’autora va compartir detalles sobre’l so procesu creativu y obres anteriores nun ambiente cercanu y relaxáu,´nun diálogu col escritor y director de la Residencia Lliteraria Xixón, Inaciu Galán, amás de col públicu.
L’autora
Idoia Carramiñana Miranda (Bilbao, 1985) Llicenciada en Filoloxía Vasca y Máster n’Estudios Lliterarios y Lliteratura Comparada. Trabayó en distintes árees, como investigadora o traductora. Anguaño dedícase a la promoción de la llectura coordinando clús de llectura y talleres d’escritura en delles biblioteques y aules d’empoderamientu. Dende 2014 coordina en Bilbo, xunto a la fotógrafa Adirane Azkuenaga, el Festival Internacional d’Arte y Poesía “Grito de Mujer”. Unu de los sos últimos proyectos ye'l podcast lliterariu feminista AHOTSA PLANETA, que ta en marcha dende l’añu 2021, xunto a Garazi Albizua na primer temporada, y acompañada por Leire Vargas na segunda y tercera, promovíu por Euskal Idazleen Elkartea y Azkue Fundazioa.
En 2018 espublizó’l so primer poemariu, tituláu BI, de la mano de la editorial Amargord. Amás, asolyó otros escritos en distintes espublizaciones, como’l rellatu infantil Zer erremedio! pa la X edición del Premiu Lliterariu Infantil y Xuvenil Bizkaidatz Txikia 2023-2024; y delles collaboraciones como artículos o entrevistes pa Euskal Idazleen Elkartea, asociación d’escritores a la que pertenez.
Desenvuelve tamién pieces de poesía visual, con exemplos en delles revistes y/o esposiciones, como’l llibru y esposición Aspectos curriculares poco conocidos de nuestros poetas visuales (2016), esposición individual de poesía visual, Simulacros, Spacio Grossi, Bilbao (2014), ente otros. Amás foi poeta convidada na xornada «Poesía rebelde», La Surada Poética, Santander. (2014), XI Jornadas de Poesía Vasca BBK. Espectáculo de poesía y música «Nos queda la palabra», un homenaje a Blas de Otero en el 40 aniversario de su muerte. (2019) y VERSO ADENTRO, Aracena, Huelva. (2019), ente otres iniciatives.
