L’Asociación d’Escritores d’Asturies (AEA) promueve delles actividaes pa les XXV Xornaes Lliteraries enfotándose na función social de la lliteratura. Les xornaes arrancaron el 29 d’ochobre nel Aula Magna del Edificiu Históricu de la Universidá d’Uviéu, cola presentación oficial y una celebración pol cuartu de sieglu que lleva activa l’AEA. Ente los actos programaos hai delles propuestes n’asturianu.
La próxima cita va tener llugar el vienres 7 de payares en Pravia baxo’l sotítulu de «La lliteratura al serviciu de la educación ciudadana». L’auditoriu de la Casa la Cultura va acoyer, ente les 11 y les 12 hores, l’apertura institucional de les xornaes cola intervención de figures polítiques y personalidaes venceyaes al mundu lliterariu y al educativu. L’actu institucional va dir siguíu d’un alcuentru con escolinos y escolines de Pravia y del CRA Baxu Nalón, nel mesmu espaciu. Depués de la posa pa xintar, yá pela tarde, inauguraráse la exposición «Tendal» con trabayos d’estudiantes y poemes d’autores de l’AEA. La programación del vienres va continuar con delles presentaciones de llibros, ente los que figura’l poemariu n’asturianu de Francisco Priegue «Les verdaderes poses del home
planta» (2024, Cuatro Gotes). Tamién tán programaes dos meses redondes: una sobre l’usu educativu de la lliteratura pa formar a una ciudadanía crítica y otra sobre la función social del teatru. El piesllu van ponelu’l conciertu de “Dúu Mestura” y la obra teatral «Soliloquio de Grillos» de Juan Copete, representada por “Teatro kumen”.
El sábadu 8 l’actividá continúa en Pravia con una xornada dedicada a «La lliteratura al serviciu de la sociedá asturiana» na que bona parte de la mañana va xirar al rodiu de la función social de la lliteratura nes llingües minorizaes. Estes ponencies inclúin personalidaes de les lletres gallegues, vasques, aragoneses y asturianes (Marta Mori). Darréu va haber una mesa redonda col tema central «Escribir dende’l recuerdu: la preservación de la memoria histórica», siguida d’un vermú lliterariu con animación musical y poética. Yá depués de la xinta, una nueva ronda de presentaciones lliteraries incluyirá obres n’asturianu como la novela d’Esther García López Xiblón. Menudu Putiferiu (2025, Orpheus Ediciones Clandestinas) y el poemariu Los fíos de Bauman de Gonzalo Llamedo Pandiella (2025, Trabe). La tarde sigue con una ponencia sobre la lliteratura oral como ferramienta de socialización cultural, mesa redonda al rodiu de «El poder sanador de la lliteratura nos colectivos desfavorecíos» y depués, espicha y nueche cultural con Dolfo Camilo Díaz y Grupu de Teatru “El Milagro”, micro abiertu y más.
L’actividá en Pravia estiéndese tamién al domingu 9 pela mañana cola visita guiada a Santianes. Yá de llunes 10, va ponese’l el ramu a les xornaes nel Edificiu Históricu d’Uniovi col actu de valoración de les mesmes, amás de la presentación y recital de la obra Tinta indistinta.
Tola información sobre les XXV Xornaes Lliteraries, actividaes complementaries y programa completu tán disponibles equí.
