L’autor va pasar el mes de marzu na RLX y va participar en dellos eventos, ente ellos presentando llibru nel POEX
Esti mes de marzu va tar na Residencia Lliteraria Xixón l’escritor gallegu de llarga trayectoria Ramón Caride, que va tar desendolcando una novela de calter hestóricu na qu’apaez la figura de Lorca y la so rellación cola cultura gallega y los autores que fueron contemporáneos de so.
Dientro de la so estancia va participar en dellos actos, el primeru d’ellos esti martes 18 de marzu a les 17:30 nel café-llibrería Toma 3, dientro del programa del festival POEX, onde va presentar Diacrónica, antoloxía bilingüe (gallegu/castellán) de la poesía del autor, acompañáu por Inaciu Galán. El segundu actu va celebrase’l 2 d’abril na Llibrería de Bolsillo y va consistir na presentación de la so obra El fríu azul, traducida al asturianu por Aymara González Montoto, que va acompañalu nel actu
L’autor
Ramón Caride Ogando (Cea, Ourense, 1957). Biólogu, divulgador científicu, activista cultural y profesor en dellos niveles de la enseñanza hasta la so xubilación de la enseñanza formal nel IES Ramón Cabanillas de Cambados, tien al llombu una perllarga trayectoria. Cultivó tolos xéneros de la narrativa, la poesía, l’ensayu, el periodismu y mesmu’l teatru infantil. Ganó dalgunos de los premios más renomaos de les lletres gallegues dende l’añu 1986, nel que s’espublizó’l so primer llibru: el Blanco Amor y el Risco de novela, el Cidade de Ourense de poesía, el Café Dublín y el Lueiro Rei de narrativa curtia, el Merlín de lliteratura infantil, o’l Frei Martín Sarmiento, en trés ocasiones, ente otros. Asina mesmo recoyó gallardones honoríficos como’l Ramón Cabanillas o’l Ínsua dos Poetes. Ye ún de los más importantes escritores gallegos actuales, autor d’una estensa obra lliteraria, con cuasi un cientu de llibros individuales, que tomen socesives reediciones y traducciones, ente elles dos al asturianu, y ensame de collaboraciones, series en prensa, espublizaciones colectives y antoloxíes.
Distintos llibros de la so autoría editáronse tamién en Portugal, España, Méxicu o la República Dominicana. En dellos d’estos países les sos obres xuveniles formen parte de los planes escolares de llectura. Los volumes antolóxicos billingües gallegu-castellán Diacrónica (2025) ya Indehiscencia (2023), A chuvia integral (2022) y el recopilatorio As máscaras de Cronos (Poemes 1994-2005), son dalgunes de les sos últimes entregues poétiques.
Na so lliteratura pa mocedá, na que siempres suel tar presente la fantasía, la ciencia, l’amor pola naturaleza y el componente llexendariu,- como bon conocedor de la lliteratura oral y de los cuentos tradicionales de diferentes cultures-, rescampla la so mirada crítica de la nuesa realidá y la convidada a la reflexón del llector sobre los problemes actuales, destacando nesti campu As aventuras de Said y Sheila (Xerais), ilustrada por Miguelanxo Prado, serie formada por una pentaloxía de noveles, con dellos recopilatorios, que percuerre dos décades -dende Perigo Vexetal (Premio Merlín 1995) hasta O camiño da Estadea (2016)-. Les sos más recientes noveles xuveniles As músicas viaxeiras (2021) y O misterio das zocas (2025), ilustraes por Dani Padrón, supunxeron la so vuelta a los alcuentros colos llectores de les aules tres del paréntesis del andanciu. Participó tamién na edición lliteraria de volúmenes como Fisterra. Relato curto en Galicia (2022) y 75 Apertas de buxo para Xosé Vázquez Pintor (2021).
Residencia Lliteraria Xixón
L’escritor y xestor cultural Inaciu Galán vivió nesti espaciu a lo llargo de cuasi una década y en 2023 punxo a disposición l’apartamentu pa la creación lliteraria dende Xixón, buscando tender pontes con otres lliteratures, otres llingües, otres cultures…
La Residencia Lliteraria Xixón abrió les sos puertes a finales de 2023 y dende entós vien recibiendo a dellos escritores y traductores con proyectos de creación.
