Del 13 al 22 de marzu, Xixón va acoyer una nueva edición de POEX, el Festival de Poesía de Xixón, consolidándose como un referente cultural nel panorama nacional. Esti añu, la poesía vencéyase de manera especial col cine, esplorando la relación ente dambes disciplines y la so capacidá pa xenerar nueves formes d’espresión artística. Estes son les propuestes n’asturianu d’esta edición:
- El domingu 16 Yolanda Castaño ya Inaciu Galán presenten al traducción al asturianu de A Segunda Lingua (La segunda llingua), de la editorial Cuatro Gotes Ediciones. Va ser a les 17 hores nel Toma 3.
- El martes 18, tamién nel Toma 3 y a les 19 hores, Miguel Rodríguez Monteavaro y Pablo Texón van presentar Nesa isla hai pantasmes. Selección de poesía contemporánea global, d’Ediciones Trabe, con llectura de poemes y coloquiu col públicu.
- El miércoles 19, nel Patiu del CCAI a les 20:30 hores, Alejandro Díaz Castaño y Ramón Lluis Bande presenten Na faltriquera y El paisaxe belixerante, ambes propuestes de la editorial Impronta. Va haber llectura de poemes y conversación con Sara Muñiz y Daniel Acevedo.
- El xueves 20, a les 18 hores nel Patiu del CCAI va presentase Argayu/Derrumbe, el poemariu billingüe de Berta Piñán, en conversación con Sofía Castañón.
- El vienres 21 a les 12 hores, nel Patiu del CCAI y pa educación primaria, Nacho Fonseca va presentar Canciones de Xentiquina, acompañáu en conciertu d’Alicia Álvarez.
Unu de los exes centrales de POEX 2025 va ser el cine como forma de resistencia a la inmediatez y el ritmu vertixinosu de la sociedá actual. Nun mundu apoderáu pola urxencia, la hiperconectividad y la sobreexposición en redes sociales, el festival propón xuna posa, xuna invitación a contemplar el tiempu dende otra perspectiva.
La programación va incluyir proyecciones cinematográfiques en collaboración col Festival Internacional de Cine de Xixón (FICX), amás de conciertos, talleres, esposiciones y el concursu de videopoemas. Coles mesmes, POEX estrecha llazos con diverses entidaes y espacios culturales de la ciudá, como la ESAD, Llaboral Centru d’Arte y Creación Industrial, la Sociedá Filarmónica de Xixón, el Toma 3, la Rede de Biblioteques Municipales y los centros educativos de Primaria y Secundaria, reforzando’l so compromisu cola comunidá y l’espardimientu de la poesía en toles sos formes.
