Con motivu de la efeméride de la revolución y depués de la primer presentación que se fixera na Semana Negra de Xixón, nesti mes d’ochobre vamos presentar la novela de Joseph Peyré (traducción de Javier Martínez Concheso y publicación d’Ediciones Trabe) n’Uviéu (23 d’ochobre a les 19:30 hores, Llibrería Trabe), Xixón (25 d’ochobre a les 20 hores, Librería La Buena Letra), Mieres del Camín (28 d’ochobre a les 19 hores, Biblioteca) y La Felguera (30 d’ochobre a les 19 hores, CSA La Xusticia). Nes actividaes va tar presente Javier Martínez Concheso, traductor del llibru que vive y trabaya en Francia.
La novela ‘L’home de choque’ publicóse va 88 años en Francia y hasta esti momentu de poder lleese n’asturianu namás contaba con dos traducciones al inglés, publicaes entrambes les dos nos años trenta. Una obra lliteraria de Joseph Peyré (premiu ‘Goncourt’ 1935) que, de manera inesplicable, nun apaez referenciada nin nos estudios clásicos de la revolución nin nes últimes investigaciones académiques publicaes nel últimu cuartu de sieglu. Una ‘rara avis’ dientro de les obres del ochobre asturianu del 34 pola so calidá lliteraria como dientro de la colección Calume, onde ye la única obra de tema asturianu.
