El Serviciu de Normalización Llingüística de la Comarca de la Sidra presentó esti xueves 20, a les 12:00 na Biblioteca Pública ‘José Fernández Guerra’ de Nava, la campaña d’animación a la llectura LLEER N’ASTURIANU TIEN PREMIU, que pretende dar visibilidá y promover la llectura de los fondos n’asturianu coles que cunten les sos biblioteques. La campaña incluí la edición d’un cartel, una pequeña guía de llectures y una ficha-marcapáxines na que los usuarios de les siete biblioteques públiques esistentes na Comarca van poder dir sellando cada vez que faigan un empréstamu d’obres n’asturianu, y qu’al final d’añu van poder cambiar por un obsequiu d’ente les novedaes editoriales n’asturianu de los últimos años.
Amás de col llanzamientu d’esta campaña, el Serviciu de Normalización Llingüística, en collaboración con l’asociación El Ronchel de Villaviciosa, vuelve a retomar esti viernes 7 de mayu’l repartu de les lletres de pan nos centros escolares pa conmemorar el día de les lletres asturianes.
Nel actu tuvieron presentes Aitor García Corte, presidente en funciones de la Mancomunidad Comarca de la Sidra y alcalde de Bimenes, y los conceyales Luis Vicente González Moro, de Villaviciosa, Jayro Palacio Vigil, de Nava y Manuel Rodríguez Onís de Bimenes.
