La 42 Selmana de les Lletres Asturianes zarróse un añu más cola celebración de la sesta edición del Entaína a escribir, el concursu de microrrellatos improvisaos n’asturianu pa xente mozo convocáu pola Dirección Xeneral de Política Llingüística y l’Institutu Asturianu de la Mocedá.
Tres venti minutos pa la escritura, lleéronse los testos de los ocho participantes y el xuráu aconceyó pa tomar una decisión. El ganador resultó Inaciu Galán, pol testu La llibretina., inspiráu na figura d’Esperanza, poeta xixonesa conocida por acompañase de palombes peles cais de Xixón.
En segundu llugar tuvo Alma Hidalgo por Fiebre d’iviernu y el tercer puestu foi pa Gonzalo Llamedo Pandiella col testu tituláu El Decamerón de Pumarín. Pa rematar l’actu entregáronse los premios, consistentes en dellos llotes de llibros ya intervino Antón García, Director Xeneral de Política Llingüística, asina como la Directora Xeneral de Mocedá. Amás, el primer premiáu va formar parte del xuráu del concursu lliterariu Asturies Xoven na edición d’esti añu.
El concursu celebróse’l vienres 7 de mayu a les seis y media la tarde en Llaboral Centru d’Arte y Creación y premió al meyor rellatu creáu en venti minutos y tres d’una inspiración que l’escritor, miembru del xuráu y presentador del actu, Dolfo Camilo Díaz, escoyó ente versos de Nel Amaro, autor al que se-y dedicó esta Selmana de les Lletres Asturianes. Nel xuráu tuvieron tamién la escritora Laura Marcos y la normalizadora y traductora María Xosé Rodríguez.
Estos son los testos ganadores:
1er Premiu – La llibretina – Inaciu Galán
Aquella muyer del barriu alimentaba a les palombes cada día, de forma cuasi compulsiva. Viérala dende neñu engurriase adulces, anque a min yá me paecía mui vieya cuando probatiblemente nun lo sedría tanto. Yera mui conocida ellí, con nomatos variaos acordies col ciñu o la zuna de caún con ella y les sos acompañantes con ales.
Col tiempu descubrí qu’aquella muyer yera tamién poeta. Repartía pan a les palombes y dacuando sacaba un versu escritu nun papel puercu y regalaba poeminos curtios, inspiraos nel amar o nel odiar, nel desasogiegu o na calma d’un día nel parque coles sos amigues alaes. Nunca nun m’atreví a averame a ella, pero podíame la gana de lleer aquellos versos de los que tanto me falaren.
Una nueche vila durmiendo nun portal y d’una de les bolses que carretaba asomaba una llibreta, la llibretina onde escribía los sos poemes. Nun lo pensé, acerquéme sele y quité-yla.
Al otru día supi que morriera de fríu naquel portal. Como si quita-y aquellos poemes fuera quita-y un cobertor.
Nunca fui quien a lleer los poemes. Guardo la llibretina pero nun soi a ello. Cuando voi al parque tán eses palombres, mirándome, xintándome la conciencia. ¡Qué lloñe me queda la paz!
2u premiu – Fiebre d’iviernu – Alma Hidalgo
Tábemos onde siempres, cola mesma sorrisa rota de paz de siempres, pero esti añu, yera’l 78.
L’añu 78… golía a paz y al mesmu tiempu a retornu, a movida con un toquecín a comida chigre. Yeren los setenta y esi iviernu nun había cuasi palombes na cai; atreveríame a dicir que nun atopábemos color n’asfaltu, nin bombes, nin metralletes, nin glayíos. Nun atopábemos más nesi añu, que l’abrazu de mio ma…
Yo siempres pensare, qu’a mio ma, llevóla la guerra, quitáronmela de la mio páxina y en cambiu, el llibru siguió esnalando páxines enllenes de sangre frío. Y güei toi entrugándome qué lloñe nos queda la voz, coles palombines xintándonos la conciencia. Toi entrugándome qué foi del cantar que nos apurrieron los setenta. Pero… yera l’añu 1978, y la mio mirada de vienres apagóse en frente una foto de mio ma.
Yo marchare como una palomba fecha ñeve; perdayuri y a teyavana, pero yo, marchare nel 78.
3er premiu – El Decamerón de Pumarín – Gonzalo Llamedo Pandiella col testu tituláu
Ehí tábemos, sentaos abanicando a güela demientres sentíemos al Piqueras dicir que tábemos n’estáu d’alarma. Paecíemos sardines en lata na sala del pisu aquel de trenta y pocos metros cuadraos, condergaos a aguantamos los cuatro mes y picu ensin sabelo. Nengún imaxinaba que güela diba acabar como la Fiammetta de Boccaccio, xugando a texer histories con un volume más altu que’l del Netflix. Y detrás mio ma, santiguándose y gritando al altu la lleva: “¡Qué lloñe mos queda la paz coles palombines xintándomos la conciencia! ¡La peste yes tu, paisana, y non la de Florencia!
