La coleición Collecha Asoleyada de l’Academia de la Llingua Asturiana algama’l so númberu 18 con La casa les venti ventanes, obra de Lluís Xabel Álvarez, «Texuca».
En pallabres del académicu, filósofu y poeta:
«Ye un poemariu al que-y vieno la inspiración d’un edificiu que nortia al oriente en pasando’l viaductu Cabañón, camín de Villaviciosa. El llibru tuvo tiempu d’asitiase enantes y dempués de la pandemia. Arrecoyó dalgunos materiales antiguos que remocicaron al integrase equí. Nun soi aficionáu a escribir lo que yá otros y otres escribieren, conque l’asturianu, y más en poemes, quítame d’esi peligru. Nel sieglu XXI, queramos o non, acoyemos delles influyencies mundiales. Una vieya sabiduría china diz que nel actu poéticu hai tres artes: una imaxe visual como caligrafía, una música nel recitáu y un pensamientu estéticu de llinguaxe. Paezme que La casa les venti ventanes tien dalgo d’eso. Lo mesmo que de la poesía simbólica y moderna al empar. Otru asuntu ye l’autoría del poemariu: la mía y la de Texuca, que yera ñomatu namás, pero que medró y fíxose heterónimu».
El llibru, que yá s’atopa en distribución comercial, va presentase esti próximu martes 10 d’avientu, a les 7 la tarde, na llibrería Matadero Uno (Riego 1, Uviéu).
