La Residencia Lliteraria Xixón entama’l taller lliterariu «Creación y interpretación de poesía» col escritor Miguel Rodríguez Monteavaro. L’actividá va celebrase’l domingu 22 d’avientu de 11 a 13 hores nel LABShop, mercáu d’arte y cultura de la LLABoral Centru d’Arte y Creación Industrial de Xixón.
Les inscripciones, a 30 euros por persona, tán abiertes nel corréu info@lliterariaxixon.com. La Residencia Lliteraria Xixón va entamar tamién otru taller lliterariu con Sofía Castañón, na tarde del domingu 22. La inscripción en dambos dos tien un preciu especial de 50 euros.
La poesía tien una vertiente escénica que se vieno desarrollando y adaptando dende los sos empiezos. Actualmente la presentación oral de la poesía puede mezclase con recursos modernos como la tecnoloxía sonora electrónica o otros elementos contemporáneos como les imáxenes proxectaes o les nueves formes testuales. Esti taller pretende dar al alumnáu una serie de recursos de creación de poemes que depués podrán ser interpretaos énte un públicu.
Los oxetivos son proporcionar a les personas participantes ferramientes de creación de poemes orientaos a la oralidá, esplicar los rudimentos básicos de la composición poética contemporánea, dar claves pa entender la propiocepción de los y les poetes y la so situación nel escenariu, deprender a interpretar testos propios o ayenos con públicu y crear una performance poética individual o colectiva a partir de les creaciones que salgan del taller.
Miguel Rodríguez Monteavaro ye poeta, músicu y doctor n’Investigaciones humanístiques pola Universidá d’Uviéu. Vinculáu a la lliteratura, sobre too, ganó dellos premios de creación poética y consiguió varies residencies artístiques polos sos proyectos multidisciplinares. Los sos testos, escritos orixinalmente en gallego-asturianu y n’asturianu, fueron traducíos y publicaos en castellán, inglés, francés o polacu, ente otres llingües.
