Lourdes Álvarez va ser la poeta del mes de l’asociación CultuRIAS esti miércoles, 17 de xineru, a partir de les 19:30 hores na Sala Club de CultuRIAS. La poeta va recitar dalgunos de los sos poemes y va entrevistase con Isabel Marina.
Lourdes Álvarez nació en La Güeria d’Urbiés nel añu 1961 y ye llicenciada en Filoloxía Hispánica pola Universidá d’Uviéu. Lourdes ye una de les meyores voces de la poesía asturiana del Surdimientu. Autora de voz única y singular, la so obra ta caracterizada pol so calter simbolista y pola so riqueza n’imaxes astractes. Ta incluyida en toles antoloxíes poétiques asturianes de los últimos años, como por casu: “Antoloxía poética del Resurdimientu” de Xosé Bolado o “Les muyeres y los díes de la poesía asturiana contemporanea” de Leopoldo Sánchez Torre.
Dende moza va collaborar con diverses revistes y publicaciones lliteraries como Cuélebre Lliterariu, Malku, Adréi y Lletres Asturianes. Ye autora de dellos llibros de poesía: “Aldabes del olvidu” (1991), “Motes de la nueche” (1992), “Mares d’añil” (1992); col que ganaría’l Premiu Teodoro Cuesta de poesía de 1992; y “Poesía escoyida 1985-1997” (1997). En 1994 volverá ganar el Premiu Teodoro Cuesta de tenía col poemariu “Como aquella que yeres”. Del añu 2006 ye la obra “Mediando alloñes”, una escoyeta de les sos otres obres. Tamién realiza traducciones al asturianu, tradució la narración infantil “Otto ye un rinoceronte” d’O.L. Kirkegaard y tamién “Un sudaca na corte” de Daniel Moyano. Anguaño ye profesora de Llingua asturiana d’Educación Secundaria Obligatoria y Bachilleratu.
Lourdes Álvarez foi reconocida col Premiu Nacional de Lliteratura Asturiana el 31 de xineru del 2023 y que convoca l’Academia de la Llingua Asturiana cada dos años.
