La escritora popular llanisca, María Dolores Sánchez «La Galana»(Piñeres de Pría, Llanes, 1937), fino esta mañana a la edá de 87 años. L’autora foi clave pa entender la cultura popular contemporanea asturiana al traviés de les sos poesíes. La so obra tuvo inspiración n’autores cercanos como Pin de Pría y otres más alloñaes como Rosalía de Castro. El so papel como escritora popular llevando l’asturianu de pueblu en pueblu, recitando nes fiestes, y llegando a asoleyar dellos llibros con Ediciones Trabe, faen d’ella esponente d’una xeneración d’escritores que caltuvieron viva la llama de la lliteratura asturiana nos tiempos difíciles del franquismu.
Dende los 3 años empezó a recitar tolos díes daqué de poesía, bien en castellán (Bécquer, Campoamor, Zorrilla, etc.) o n’asturianu (Pepín de Pría, González Abín, Acebal y Gutiérrez, etc.).
El so enclín como escritora manifestóse dende bien temprano, faciendo’l so primer escritoriu «campestre» nuna solera de mosques de miel (abeyes) que morrieren, poniendo una tabla pequena enriba del setu, y un tueru d’asientu. Ésti yera l’escritoriu que tuvo dende los 6 a los 9 años, onde escribía en cayuela, papel, a llápiz o a tinta. Na posguerra, en metá de la murnia y de la apatía xeneral, María Dolores Sánchez escribió coses allegres, típiques. La primer Retórica-Poética qu’estudió, a los 12 años más o menos, foi la de González Abín, que-y emprestaron el so fíes. Estudia bachiller y aprovecha pa lleer tolo que puede compaxinándolo con otros trabayos.
Foi collaboradora habitual con composiciones n’asturianu en periódicos, llibros de fiestes,
turísticos, relixosos, etc. Na Biblioteca «Ramón Pérez de Ayala» (Uviéu) quedó fechu depósitu llegal del llibro Poesíes la Galana con fecha 20 de febreru de 1998; con fecha 2 d’agostu de 1999 inscribió’l llibru de poesía col títulu Sumiciu; Manoyos escoyíos, el so llibru publicáu en Trabe, foi presentáu na Casa de la Cultura del Valle de San Xurde (Llanes) el 28 d’agostu de 2001.
