El Club Xeitu fixo públicu que’l premiu del XI Concursu de Recoyida de Toponimia ‘Concha de Lama’ foi otorgáu al trabayu “Toponimia de Matalavilla”, presentáu por Ovidio García Fernández sobre esta localidá del Altu Sil.
El xuráu, presidíu pol xeógrafu y director de la serie Toponimia del Club Xeitu, Ignacio Prieto Sarro, ya integráu pola profesora de la Universidá de Llión Raquel Domínguez García y l’anterior ganadora del concursu, Marta Prieto Sarro, actuando como secretariu Víctor del Reguero, motiva la so decisión en “el conxuntu del trabayu, reparando que s’afai a lo contenío nes bases del concursu, especialmente la creación d’un llistáu de más de 300 topónimos perfectamente alcontraos na cartografía y la recoyida de la forma orixinal d’aquellos en patsuezu”.
El premiáu, Ovidio García Fernández (Matalavilla, 1958), cursó estudios na escuela del pueblu y l’institutu de Vil.lablinu, empecipiando la carrera d’Inxeniería Industrial en Xixón y Béxar. Trabayó na minería del carbón y el caltenimientu del osu pardu, y n’impactos ambientales de parques eólicos hasta la so recién xubilación. Unes ocupaciones que combinó colos llabores propios del mundu rural y la talla de madera, la so otra gran afición. En 2008, publicó’l llibru Matalavilla: memoria d’una aldega llionesa, en coautoría col fináu Adolfo Fernández Pérez.
El Concursu de Recoyida de Toponimia ‘Concha de Lama’, convocáu pol Club Xeitu en collaboración col Institutu Lleonés de Cultura dende 2012, algamó nesta ocasión la so undécima edición. El premiu tien una dotación económica de 500 euros y la publicación de la obra ganadora na serie editorial dedicada a esta temática, cola que se recuperó yá esti patrimoniu inmaterial en riesgu de desapaición de numberosos pueblos del monte occidental ástur-lleonesa.
