La ventésima novena edición del Premiu Xuan María Acebal 2023 de poesía n’asturianu fallóse en favor del autor avilesín Xosé Anxelu Gutiérrez Morán pola so obra Les hores de lluz. Nel acta del fallu, el xuráu destaca «un llibru intensu, de voz precisa, que vuelve la mirada sobre la meyor tradición poética del Surdimentu, cola que dialoga abiertamente, llogrando da-y un timbre nuevu, personal y inconfundible”. El xuráu quixo valorar amás el nivel de toles propuestes presentaes.
Les hores de lluz ye una colección de poemes unitaria y equilibrada, a criteriu del xuráu, qu’amás resalta la riqueza formal del poemariu nel que les composiciones tienden a una consiguida y evocadora brevedá, que toma dende la suxestiva síntesis del haiku a pieces de ritmu más abiertu, igualmente concises, siguiendo l’ideal de naturaleza espresiva y difícil facilidá defendida polos clásicos.”
El xuráu d’esta edición tuvo presidíu pol director xeneral de Política Llingüística, Antón García, y integráu por Rodrigo Olay, Iris Quintana y Marta Mori, ganadora de la edición pasada. Actuó como secretaria Lourdes Álvarez, filóloga de la Dirección Xeneral de Política Llingüística.
El premiu Xuan María Acebal, convocáu pola Conseyería de Cultura, Política Llingüística y Turismu, ta dotáu con 6.000 euros y la publicación de la obra ganadora.
Xosé Anxelu Gutiérrez Morán (Avilés, 1969). Ye doctor la Bioloxía pola Universidá d’Uviéu y investigador del Centru Oceanográficu de Xixón. Autor de más de 120 artículos d’investigación en revistes científiques internacionales y dellos capítulos de llibros dientro del so ámbitu académicu. Como autor n’asturianu tien publicaos los poemarios Diversa memoria (Premiu Teodoro López Cuesta de Poesía) y Un ciertu desorde, amás de collaboraciones en revistes lliteraries.
