La revista lliteraria mui moza Formientu ta acabante d’asoleyar una edición nueva, cola que suma yá 19 númberos, siendo la única revista que puxa pola producción lliteraria ente la xente mozo n’Asturies. Tres el númberu anterior, marcáu poles actividaes del #FormientuEnCasaFest de la revista mientres el andanciu de la COVID-19, con esta edición nueva preténdese volver a la normalidá, con delles estayes que faen un bon repasu a l’actualidá lliteraria.
Son 15 las y los autores qu’apaecen nesti númberu, repartíos en 4 estayes, onde predominen sobre manera la prosa y la poesía. Sicasí, tamién hai espaciu pa otres producciones, como la crítica lliteraria, la traducción o una entrevista a Diego Solís, co-director de Formientu y que va poco asoleyó’l poemariu pop Volvemos en 6 minutos. D’esta mena, Alma Hidalgo, Andrés Fernández, Kai C. Torel, Aníbal González, Elena Álvarez, Gonzalo Llamedo, David Fernández, María Fernández, Julia Salinas, Nacho Wings, Pablo Álvarez, Patricia Suárez, Raúl Alonso, Mark Brady y Sara Areces enllenen Formientu 19 d’una bona bayura lliteraria.
El númberu nuevu yá ta disponible nes principales llibreríes d’Asturies y la edición cuerre a cargo de Cuatro Gotes Ediciones y ta illustráu con semeyes del tamién escritor Raúl Alonso.
