El xuráu del XVIII Concursu de Cuentos Curtios de Cangas, decidió premiar al llionés Armando Gutiérrez Rodríguez pola so obra ‘Divina Providencia’ y al asturianu Pablo Suárez Fernández por ‘Escritora de taces’. Asina lo reflexa l’acta del xuráu, formáu por Laura Marcos, filóloga, docente, escritora y coordinadora autonómica de la Rede de Normalización Llingüística nos Conceyos; Pilar Arnaldo, filóloga, docente y escritora; Marta López, filóloga, docente y crítica lliteraria; María Cueto, filóloga, docente ya investigadora; y Mónica Rodríguez, responsable del Serviciu de Normalización L.llingüística de Cangas, quien destaca que los dos cuentos tán escritos cola corrección que da la esperiencia lliteraria y constrúin hestories próximes al nuesu propiu contestu bien encontaes y desenvueltes.
La primera de les hestories, d’Armando Gutiérrez, ta ambientada en Cangas y cuenta como narrador testigu col mesmu Xovellanos. D’esta miente, esti autor llionés, afincáu n’Asturies con una trayectoria lliteraria respondida por por premios esvalixaos per tola nuesa xeografía, revalida’l premiu que yá consiguió nesi mesmu concursu en 2018.
La segunda obra, de Pablo Suárez, ye una narración más introspectiva y centrada nel devenir vital d’una persona mental y psicolóxicamente confundida, pero col propósitu firme de recomponese y avanzar escontra la reconstrucción de la vida propia, abandonando, pa ello, los llazos que lu llinden. El so autor, ye un escritor más que reputáu n’Asturies, con un estilu que va del clasicismu al pop, pasando per tou tipu de formatos y estilos. Ente otros premios, ganó en 2017 el Premiu Xuan María Acebal de poesía col poemariu Little Babilonia.
Dambos cuentos tán disponibles pa la so llectura na páxina de Facebook del Serviciu de Normalización L.llingüística de Cangas. Los premios pretenden ser apurríos, si la situación sanitaria lo permite, mientres la Selmana de les Lletres Asturianes de Cangas, nel mes de mayu.
