La escritora llangreana Helena Trexu Fombella presenta «Piedra gris con rellumos doraos», un llibru editáu pol Grupu Epona, el vienres 16 d’abril a les 19.30 hores na Vieya Escuela Comerciu de Xixón.
El llibru trata sobre les muyeres compositores na hestoria, nun rellatu cuntáu por una neña, Dobra, que tien una ma que tamién ye música y ella mesma toca un instrumentu. «Ye un llibru surdíu del confinamientu, fecho col envís de visibilizar y homenaxar la música compuesta por muyeres, cuasi siempres amatagada y a vegaes inclusive apropiada polos homes, y alendar a les nueves xeneraciones de neñes y moces a que lluchen polo que-yos presta y nun se dexen influyir por estereotipos», esplica l’autora.
Pola normativa sanitaria pol andanciu del covid19 ye menester apuntase enantes pa poder acudir al actu, unviando un email a grupu_epona@yahoo.es col nome y el teléfonu.
